MPCC Campaign Committee ruahman angin Pu Lal Thanzara, MPCC Vice President leh a team-ten East Tuipui North Block huam chhung khaw hrang hrang an fang mek a. Farkawn, Vaphai, Saikhumphai, Chawngtui, Dungtlang, Khuangthing, Zawlsei, Thekpui, Thekte leh Khankhawn-te tlawh mekin, khaw hrang hranga Congress party hruaitute leh khawtlang mipuite an kawm a ni.
MPCC Vice President Pu Lal Thanzara chuan Congress party chu Pathianin Mizoram hun lo awm leh zel tur atan a buatsaih thin tih sawiin, “MNF in an tih pam tul tawh Falkawna State Referral Hospital behchhanin Mizorama Medical College hmasa ber, Mizoram Institute of Medical Education and Research (MIMER) chu Congress party in a tungding a, hripui len laia Mizoram mipui thlamuanpui leh mamawh chhanna a ni. Tunah phei chuan MBBS zirlai mi 100 (seat 70 chu Mizo zirlai tan, seat 15 central pool, zaa 15 dang chu NRI Quota) ten an zirlai an lo zo thei dawn ta a, a lawmawm tak meuh a ni. Hripui a lo leng a, hmun hrang hranga kan unaute Mizoramah an lo haw a ngai a, kan mi leh sa te awlsam taka an lo haw theih nan rel kawng fel taka lo buatsaih a ni a. Tin, hun harsaa hmanhmawh thila Mizoram mamawh lakluh nan leh phai lam hmanhmawha kal nan Airport tha tak Pathianin Congress party kaltlangin a lo buatsaih a. Power lamah pawh MNF in sumsiamna atana an hman avanga an pamtul tawh Tuirial hydel Project tha taka puitlin a ni,” a ti.
Pu Lal Thanzara chuan, “Kan sorkar hrawn mek hian Mizoram mipui sum nasa takin an suasam a, MNF sorkarah mi retheiten chanvo an nei ve lo. Mi pangngai rin an hlawh tawh lo. An mang a ang a, sum enkawl thiam loh vanga leiba tam tak rulhna atan midang pawisa puk chhawn leh ngaiin min siam mek a ni,” a ti bawk.
Congress Party kalphung a danglam dawn tih sawiin, “Congress party inbuatsaih thar zelah hian inthlan kan hmachhawn dan pawh nasa takin a danglam tawh dawn. Kohhran mit tlung takin Inthlan kan hmachhawn dawn a. Pu Lalsawta’n That Loh Theih Lohna Bawm hmangin min hruai dawn. Tuna Chief Minister tura atana mi duhrawn ber leh rinhlawh Pu Lalsawta hmanga Pathianin min buatsaihna dan hi kan lawm hle a ni. MCS ah pawh an batch a ti tha ber, sorkar hna a thawh lai pawha hming tha, Congress ministry a hmingtha taka sum leh pai enkawltu, a hmalakna vanga Mizoram state in RBI atanga sum puk ngai lova min siamtu a ni a. Pu Lalsawta ah hian beiseina sang tak kan nei a, kan lung awi a, Mizoram mipui pawh an thla a muang a ni. ZPM hi miin an hriatchian loh avang hian tha emaw an ti thin, mahse an hriatchian hunah chuan an rilru a na dawn. Midang aia tha leh danglam zawk anga in zuar, an thusawi bawhchhiaa hlawkna awm thei thei pawisa lo a engkim duh ve vek an ni,” a ti.
“Chuvangin Congress ah haw runpui an nei mek, lo haw ve rawh u. Tunah hian kan mithiamte nen Ram mipui leh Ram tana tha ber turin Policy uluk takin an duang mek a. NLUP hmangin Ram mipui rawng theihtawpin kan lo bawl tawh. Chumi hun chu a liam tawh a, tunah chuan mi taimate tanpuina tur, Tang Puihna chu kan kal pui dawn. Pu Lalsawta ho hian sorkar hrim hrim kan tum a ni lo; Mizoram mipui tana sorkar tha (Good Governance) That loh theih lohna bawm din a, mipui rilru siam that (Moral reform) hi kan tum a ni. Mi tha tak tak, Candidate Pathianin min pe dawn, Aizawl leh Mizoram chhung bial danga MLA tha tak tak tur mi hmingtha leh mite rinhlawh an lo kal dawn, lo thlaphang suh u,” a ti bawk.
Pu Lal Thanzara hi MPCC Gen. Secretary pahnih Pu PC Laltlansanga leh Pu V. Lalthazuala bakah Pu Johny Zonunmawia EM, MPCC, Pu Lalrochhara, Media Deptt member leh Pu Lalramzidinga Secy, MPYCC ten An tawiawm a ni.
