Vawiin ni 12.8. 2022 (Zirtawpni) chawhma Dar 11:00 khan Golden Hall, Congress Bhawan-ah MPCC Zirtawpni Political Session programme hlawhtling tak, Lt.Col.ZS Zuala, Ex-MLA kaihhruainain neih a ni a; he hun hi India Independence Day vawi 75-na puala hman niin, Resource Person Pu Sangzuala Hmar, Chairman Social Media Deptt in ‘BJP Thupui: Zalenna Zin Kawng Tihdanglam’ tih thupui ngaihnawm tak Power Point Presentation a nei a. MPCC President Pu Lalsawta leh Dr.Lallianchhunga, MPCC Spokesperson te’n thu an sawi bawk.
He huna thusawitu MPCC President Pu Lalsawta chuan, Congress party kan sorkar loh chuan ram hi a ngaihtuahawm thin a. Kum 2023 a kan sorkar loh phei chuan kan ram chhiat dan tur hi a nasa dawn a. Chuvangin, a chhelai siam thatu ni turin, Congress party a lo awm tawh zawng zawng, engemaw vanga kan party atanga chawl tawh te pawh, Congress party a lo haw khawm leh vek turin thinlung leh tihtakzetin ka sawm che u a ni, a ti.
He huna thusawitu dang, Dr. Lallianchhunga, MPCC Spokesperson chuan, ‘Congress party hi sakhaw zalenna leh mihring zalenna chawisangtu leh humhim duhtu party a ni a. Central a BJP a sorkar hnu hian Kristian te rawngbawlna hrang hrangin harsatna a tawk chho mek a, tunhma angin Kristian Missionary te’n zalen takin Crusade an nei ngam tawh lo, Bible Tract pawh zalen takin an sem ngam tawh lo; Central Hindu BJP sorkar hnuaiah MNF party hotute hian Kristian te thlavang vawi khat mah an la hauh lo’ a ti.
‘Mizorama Congress party chak leh chak loh hi Delhi a kan dinhmunin a hril lo’ tih sawiin Dr. Lallianchhunga chuan, ‘Mizoram a Congress party innghahna chu Lal Isua a ni a. Pathian duhdana insiam tha a, candidate leh policy tha kan neih a piangin mipuiin min thlang tling thin. Election Manifesto pawh Mizoram mil tur Congress party in a siam a, chumi hmang chuan Zoram mipuite hnenah kan inpho chhuak a. Central-ah Congress party in sorkarna a siam leh siam loh hi Mizoram a Congress party innghahna a ni lo’ a ti a. ‘Delhi a Congress party dinhmun nena Mizorama kan dinhmun sawi zawm thintute hi Central Hindu BJP a innghat party an ni a. Mizoram BJP President in MNF te hi BJP hnen atanga inthlanna campaign senso, sum leh pai dawng angin alo puh tawh a. Nov.30,2020 khan Mizoram chhung ngeiah, Press mite hmaah Nagaland BJP hruaitu leh Mizoram viltu, M.Kikon ngei pawhin ‘MNF te hi BJP vanga sorkar thei chauh an ni’ tih a sawi pawh tun thlengin MNF hotute’n an chhang ngamlo,’ a ti bawk.
MPCC Spokesperson Dr. Lallianchhunga chuan, ‘Mizoramah hian tualto (regional) party tam tak a ral tawh. National party lian tak, Congress party kan awm chhung chuan Tualto party (regional party) lian tak 2 a awm thei lo, MNF leh ZPM te hi an indip ral thuai dawn. ‘Min enchhin rawh u’ titute hi mipuiin kan enchhin tawh hnu te, kan duh loh a kan paih leh tawh hnu te an ni a. An zinga thenkhat chu vawi engemawzat inthlanna lo chuh ve tawh, mipuiin enchhin tlaka kan ngaih lohte tho kha an ni’ a ti.
Dr. Lallianchhunga chuan, ‘Congress party chu harsatna nasa tak paltlang tawh a nih avangin a chhel a, tha hrui a nei bawk. Eptu party dinhmun atanga Mizoram dinhmun hmufiah lehzual tura Pathianin min buatsaih changte pawh a nei a. Chumi dinhmun atang chuan, Pathian hriatpuia theihtawp chhuahin, Mizoram mipuite tana sorkar tha leh rintlak siam turin kan inbuatsaih mek a ni’, tih a sawi.
