MPCC Vice President Pu Lal Thanzara chuan East Tuipui bial fang kualin khaw hrang hrang a tlawh a. He hunah hian a kalna khua apiangah te inkawmhona hun ṭha tak neih ṭhin a ni a, khaw tinah congress party mipuite an hlimin an phur thar hle a, Sesih khuaah Congress zawm thar MNF aṭangin voters 6 leh neutral aṭangin voters 4 a vaiin voters 10 a lawmlut nghal bawk.
He mi thar lawmluhnaah hian thu sawiin Pu Lal Thanzara chuan ‘Mizorama sorkar hnathawkte zingah hian mi fel, hlemhletna duhlo, eiru duhlo, ṭhahnemngai taka hnathawk ṭhin tam tak an awm a. Heng mite hi tun dinhmunah an beidawng em em a, sorkar ṭha, hruaitu rinawm, Chief Minister eiruk laka fihlim neih an duh a. Chutiang mi chu kan hotupa Pu Lalsawta hi a ni.’ a ti a. ‘Sorkar hna a thawh laite, Minister a nih laitein eiru thei dinhmunah a awm chungin hlemhletna lakah hmingchhiatna a nei miah lo a. Sorkar ṭha siam duh neutral te duh rawn Pu Sawta hi a ni mek’ a ti bawk.
Pu Lal Thanzara chuan ‘MNF hian kan sorkar chuan SEDP ah nuai 3 ṭheuh kan pe dawn cheu a ni tiin min tiam a. Chumi beisei chuan mipuiin sorkarna an kutah kan pe a. Tunah Rs 25,000 ah an tihniam leh a. Hei hi a chhan chu, nuai 3 an sem theih dawn loh avanga MNF mipui beidawng lutuk tuamdam an tumna a ni a, mipuite hi min hmusit hle a ni. Congress party chuan mipui hnena kan thutiam kan tihlawhtling zel ṭhin. Ram buai laiin Remna leh muanna te, rangva inchung neilo tan rangva te, NLUP pawh cheng singthum te, nuai khatte kan lo tiam ṭhin a. Sorkarna kan chan chuan kan intiamna te kan tihlawhtling zel ṭhin, MNF te hi chu hmanah MIP cheng singnga min tiam a, cheng Sangsarih a sem leh tute tho kha an ni. Tun ang hun, SEDP chawchah mek pawh tlansan ngama congress party a in lo tel duh hi kan lawm takzet a ni’ a bawk.
Mithar lawmluhte aiawhin Pu Dalsawmdinga Sesih khua chuan thusawiin ‘Congress in hma a sawn em avangin MNF bansanin, SEDP dawn loh huamin ka lo lut a ni’ a ti bawk.
