Vawiin June ni 23, 2023 hian Congress Party chuan Congress Bhavan Golden Hall ah Political Session hmangin Mizoram Chief Secretary lo ni tawh Lalnunmawia Chuaungo in thusawina hun a hmang.
Lalnunmawia Chuaungo chuan, Congress Party chu India ram zalenna sualchhuaktu, Hnam te nau te dikna humhalh a ni a. Congress Party chu sakhaw zalenna chawinungtu a ni, tih sawiin, hnam hnufual zawkte leh sakhaw tlem zawkte hian thlavang hauhtu an mamawh ṭhin. Congress Party chuan chung mite thlavang hauhin a humhalh thin. BJP erawh chuan tuna India rama hnam leh sakhaw chungchang buainaah a ngawi reng a, an thlavang hauh a hauh duh tlat loh avangin hei hian Congress party ropui zia a ttarlang a. Sakhaw zalenna vawng him a veng him tur chuan Congress party a awm angai a ni, a ti.
Lalnunmawia Chuaungo chuan rambuaiah kum 20 chhungin awmin remna leh muanna duhin kan tuihal a. Mipuite duhdan ang ngeiin remna leh muanna kan neih theih nan Congress Party chuan a sorkarna a namthlu ngam. Remna leh muanna chungchangah mi ṭhenkhat thangṭhat laktum te virbuai hle mahse, a hun takah Pu Lal Thanhawla chuan remna leh muanna a rawn thlen ta a ni, a ti.
Mizoramah hmasawnna hna tam tak thawh a ni tawh a, thawh zawh hman rih loh te pawh a awm. Ram leh hnam din chhuahna tak tak atana thawktu tur atan Congress Party lo chu an awm chuang lo tih sawiin, kum 2023 inthlan zawh aṭangin Pathian duhdanin Congress party chuan ram leh hnam tan hna a thawk ṭan dawn a ni, a ti.
Chief Secretary hlui chuan, MNF leh Congress party hi Mizorama party ruhrel lian ber an ni a. Sorkar tur erawh chuan neutral vote a pawimawh thung tih sawiin, Pu Lalsawta hi Mizoram mipui rin ber a ni. Sorkar kalphung thlak a, siamṭha thei ber tur chu Chief Minister an nih miau avangin tunge Chief Minister atana ṭha ber ang tih thlir chunga vote thlak tura mipui kan zirtir a pawimawh a ni. Kan Chief Minister tur hi thil te thamah a rinawm a, thil lian thamah a a rinawm bawk, a ti.
MLA fel tak tak Party tinah an awm ṭeuh. Nimahsela, Chief Minister berin a zir loh chuan kan ramin hma a sawn dawn chuang lo. Chief Minister ṭha hi kan mamawh. Chief Minister tha kan neih theihna turin ngaihtuahna fim tak hmang turin Zoram mipuite ka chah duh a ni, tih sawiin, Party tinte hian kan manifesto-ah enge an dah tih hi zir chian angai. Hmasawnna ngialnghet engtin nge kan thlen ang, tih hi kan ngaihtuah a ṭul, a ti.
Lalnunmawia chuan, eirukna kan nuaibo theihna tura hmanraw ṭangkai tak chu Lok Ayukta a ni. Hei hi Congress Sorkar hun laia din a ni a. Anti-Corruption Bureau (ACB) hi Vigilance chan a ni a. Chief Minister enkawl a ni a. Hotu lian chhui turin harsatna a awm phah ṭhin. Chuvangin, Congress Party in sorkarna kan chang a nih chuan Lok Ayukta-ah ama puala chhui theihna (investigation) nei turin hma kan la dawn. CBI ruai turin State sorkar phalna lak angai a. Lok Ayukta in CBI rawih a dilna vawi 2 state sorkarah a dil tawh a, mahse phalna an la hmu lo. Pu Lalsawta hova sorkarna kan siam chuan chhui kan ngam dawn a, chhui ngai tur erawh kan ni ve dawn lo, a ti bawk.
