Vawiin ni 11-7-2025 Zirtawpni hian Mizoram Pradesh Congress Committee chuan Congress Bhavan ah Political Session an hmang a, he huna thusawitu Dr Lalmalsawma Nghaka, Treasurer, MPCC chuan thusawiin, “Vawiina sawrkarna chelh mek ZPM thiltih dikloh te kan sawi thin a, heng kan sawi te hi Social Media ah thenkhat chuan ZPM pawngpaw sawichhia angah min puh thin. Amaherawhchu, Congress party hian document te, a tihchianna engemaw tel lovin thil kan sawi ngai lo, Congress party chu thudik ah kan ding thin.
“Kan GST khawn tlahniam chak lutuk te hi eng emaw thil fello a awm a ni. Sumdawng ten inhralh har an ti a, phat ruallohin sum lengvak a tlem hle a ni. State Sales Tax an tipung a, Social Infrastructure leh Road Infrastructure Cess te an la a. Heng an tax lak te hi a hmanna turah an hmang em kan hre lo. Social Infrastructure Cess te hi mi harsa tanpui nan te hman tur a nih laiin engmah a thawm kan hre lo. Road Infrastructure Cess te hi kawng siamna tur atana an lak a ni a, mahse kan kawng te chu tlan hrehawm khawpin a chhe em em si a ni. Heng zawng zawng hi mipui hian an tuar em em ani tih phat theih a ni lo. PWD Engineer pakhat chuan hna reng reng hi Departmental work in an thawk a, sawrkarin supervisor an ruat leh si a, Department in hmingchhiat an tuar leh si tiin min hrilh a ni. Health Minister in Health Care sawiselna reng reng chu kan Officer ten an chhang zel ang a ti niin an sawi a, PWD chungchang te hi rawn chhang ve zel se kan duh a ni.
“ZPM Sawrkar hian hming thlak a, anmahni hminga chhuah hi an thiam zawng tak a ni. Central atanga Scheme hrang hrang lo kal te hmang tangkai in Banakaih hming an phuah a, Central ina BPL leh AAY te tana Health Care a siam Ayushman Bharat te pawh anmahni kutchhuak angin Mizoram Universal Health Care ah an hnuklut leh mai a ni. MNF in an puitlin zawh loha an pamtul thak Referal Hospital, kan President Health Minister anih laia a tharthawh leh a Medical College a an din chhoh pawh hi hun a kal anga an kutkawih angah an chhuah duh leh mai in a rinawm.
“Health Care te hi an sawi ang hi nise thil tha tak a ni a, mipui pawhin an chhawr ngeiin a rinawm. Tunah te hian private hospital te nen hian inbe rem se a takin kalpui thei se kan duh dan a ni. Mahse an kalpui tum dan hi a thu in tha mahse a takah an kal dan a dik loh avangin mipui in an chhawr tak tak thei lo hi a pawi hle.
“Congress hi mipui in min hriatdan chu kan ti ang kan tih chu kan ti thin. Congress hian kan sawrkar laiin thil tha tamtak kan lo ti tawh a, kan ti lehzel dawn bawk a ni.” a ti.
He Political Session hi Tamlal Lohar, Secretary, MPCC chuan a kaihruai a, C. Vanlalhruaia, Gen Secy. MPYCC, Vanhnuaithanga, Gen Secy. ADCC, C. Zodinliana, Chairman, Transport Dept., Lalnilawmi, Secy. MPCC ten report an pe a, ram vei em em, Baptist Kohhrana kgaipa zinga mi tukina boral ta Rev. HS Killuaia sunna hun hman a ni bawk.
