Congress Thalai (MPYCC) chuan, “Student Self-Support Union (SSU) Gen. Hqrs. ten Vision 2023 an buatsaiha Congress party aiawha tel ten kan party Manifesto Tang puihna chungchang bakah Corruption tih bo dan tur chiang taka an sawi chhuak chu Congress Thalai chuan lawmawm kan ti a, hetianga platform tha leh changkang tak buatsaihtu SSU te chu fakawm kan ti hle a ni,” an ti.
Vawiina thuchhuah an siamah MPYCC chuan, “Pathian leh mipui zarah Congress party in sawrkar kan chan chuan kut hnathawktute ngaih pawimawh a nih tur thu Pu Lalsawta’n chiang taka a sawi chu ram mipuite tan innghahna tlak a ni a. Tang taka hnathawkte leh tan ngaihna hre lo te tan pawh Congress sawrkar chu a awm dawn a, he programme a hlawhtlin ngei theih nan mipuite thlawpna kan ngen takzet a ni.
“Congress party chuan kan tihhlawhtlin ngei tur leh kan tih theih ngei tur chauh kan sawi thin a. Thalaiten eizawnna ngelnghet kan neih theih nan inzirtirna leh ruahmanna pawh Pu Lalsawta ho hian buatsaih mek a ni a. Kan ram economy siamthatna tura policy duan pawh mi rinawm, taima leh tumruhna nei ten an hlawhtlinpui ngei theih nan ram pum huapa puanzar chhoh mek zel a ni. Tin, tuna kan ram dinhmun en hian enchhin tih hi a ngamawm tawh lova, kan ram sum leh pai dinhmun chhe lutuk siamtha tur hian tawn hriat nei leh a ngaihna hre sa bakah enchhin chawp ngai lo Pu Lalsawta hi kan ram mamawh a ni tih chu Congress Thalai ngaihdan a ni a. Sawrkar tha leh ram sum leh pai dinhmun siamthaa Pu Lalsawta tha tichak turin Mizoram mipuite Congress Thalai chuan kan sawm tak meuh che u a ni.
“Hetih laia ruling party MNF ber Vision 2023 programme-a an tel lo chu Congress Thalai chuan pawi kan ti hle a, policy mumal an neih lohzia leh thu an lo tiam tawh tam takte tihhlawhtlin an la neih mang loh avanga mipui hmaa inlan ngam lohah kan ngai a ni,” an ti bawk.
