Vawiin khan Congress media department chuan Aizawl Press Club ah thuthar lakhawmtute kawmin, an Chairman Dr. Lallianchhunga chuan,
Tunhnaia Mizoram a thil thleng hrang hrangte ngun taka thlirin MNF sorkar kan hrawn mek hi sorkar tha a nih loh zia a lang chho zel a. Hmasawnna hna thawhna tam zawkah thil dik lo inphum haichhuah tur a awm rengte hian MNF-in dik an tlin loh zia a tarlang chiang hle a ni, a ti a.
Sorkar-in COVID-19 kara inkaihhruaina, Standard Operating Procedure (SOP) a tihchhuahah reng reng chiang takin Kohhran inkhawmna a zai phal a nih loh thu tarlan a ni thin a, hetih lai hian November 30, 2021-a SOP thar berah chuan Kohhran inkhawmnaa zai theih tur leh tur loh chiang taka tarlan a ni ta lo a. Kristian-te hunpui Krismas kan hmachhawn dawn lai mekin inkhawmnaa zai leh zai loh chu Kohhran thutlukna siam turah a dah ta daih a ni, a ti a. COVID-19 Hrileng chungchangah MNF sorkar hian eng thilah mah mawhphurhna a la ngam ngai lo a, engemaw palh a thlen pawha Kohhranin dem a kai theihna turin Kohhran lakah thang a kam tihna a ni a. Hei hi rorelna zahpuiawm tak leh Kohhran zah lohna niin, sorkar tha lo zia dik tak a ni a. Chhun lama khawsak pangngai a kan khawsak theih vek tawh lai leh, pinnic spot thlenga hawn a nih tawh laia zan lam curfew dar 9:00 atanga zing dar 4:00 khauh taka kenkawh tura tih a la ni ta reng pawh hi rorelna awmze nei lo leh puitling lo tak a ni a, mipuite harsatna siamtu mai a ni, a ti..
MNF sorkar chu sum leh pai enkawlna kawngah a hlawhchham chiang hle bawk ni a sawiin, Sorkar hnathawk tam takin kum khat hnuah pawh an pension pawisa an la thei lo a, officer lian leh sawipuitu nei tha deuhte pension pawisa pekchhuah a nih reng laiin sawipuitu nei ve lo mi nawlpuite pension pawisa erawh tam tak hren sak an la ni a. Chutiang bawkin Healthcare bill sang tam tak pek theih lohin a awm mek bawk a, contractor-te bill vaibelchhe tam tak a batsak mek bawk. Heng zawng zawng hi COVID-19 vang ni lovin, sum leh pai enkawlna kawnga MNF sorkar hlawhchham chian em vang a ni a. MNF sorkarah hian sum leh pai chet vel danah kalphung mumal a awm lo a, danin awmzia a nei hek lo. Heng zawng zawng hi sorkar tha lo zia dik tak a ni, a ti bawk.
MNF Party chu a din tirh atanga chhut pawhin MNF an sorkar apiangin Mizoramah thil dik lo nasa takin a hluar zel a. Tun sorkarah pawh kum 10 kal ta a MNF sorkar hunlai ang thoin Advertisement chhuah lo a hna lak a tam leh hle tawh a, MPSC hna lak tur tam tak pawh an duhsak zawngte an thun theihna atan Departmental a lak a ni bawk. Hmasawnna hna liantham deuh an thawh hlekin eirukna liantham tak tak chhuichhuah tur a awm zel a. State sorkar mai ni lovin, District Council leh Village/Local Level thlengin MNF-in sorkarna an siamna reng rengah thil dik lo a hluar zel a ni. Hei hi a taka hretu chu Mizoram mipui kan ni, a ti a.
MNF sorkarah chuan MLA-ten Department-a information an mamawh an dilte pawhin ngaihven a hlawh lo a, NABARD hnuaia School building sak thar leh repair hna vaibelchhe 35 man an thawh mek chungchanga Congress MLA pakhatin November 19, 2021-a School Education Department-a zawhna a siam pawh tun thlengin a chhanna chu sawi loh, danin a sawi angin acknowledgement pawh pek a la ni lo a. Thil dik lo thup tumna a awm em ni kan ti hial a ni.l, a ti a.
Dr. Lallianchhunga chuan MNF sorkar hian thil tha tih an nei lo kan ti hauh lo a, amaherawhchu, he sorkar hi Mizoramin sorkar a neih tawh zawng zawnga sorkar tha lo ber leh puitling lo ber a la ni hialin kan hria a ni, a ti bawk.
Dr. Lallianchhunga chuan, Congress Party hian Sorkar Tha siam kan tum a, mipui tan rintlak kan nih zia lantir tumin kan insiamtha mek bawk. Opposition Party tha tak nih tumin nasa takin hma kan la mek bawk a, sorkar kan khalh ngilna tur kawngah leh, mipui thlavang hauha kan chet zelna turah thurawn leh information/document pawimawh kan dawng thei reng a, Mizoram siamthatna kawnga thawhpui atan Mizoram mipui kan sawm a ni, a ti bawk.
