Vawiin May ni 3, 2022 (Thawhlehni), Mara District Council inthlan campaign tawp niah hian Siaha khawpui chhung hmun hrang hrangah Congress Party Street Campaign neih a ni a. Pu Lalsawta, Congress Party President leh hruaitu dangten thu an sawi.
MPCC President Pu Lalsawta chuan Congress party-in Mizoramah hmasawnna tam tak a thlen tih sawiin, “Min hringtu central lama Congress hruaitute pawhin Minority-te a hmangaih a, kum 1952-a District Council kan neih tirh khan a India ram Prime Minister, khawvel pawhin a ngaihsan em em Jawaharlal Nehru chu District Council pualin Mizoramah a lo kal vang vang a ni. BJP hian kum 8 teh meuh sorkarna an chelh hnuah MADC an ngaihsakna lantir turin Siahaah Narendra Modi a lo la kal miah lo a ni. Congress Party hi hnam tlem zawk leh harsa zawkte ngaihsaktu a ni a, a ni reng bawk ang. BJP chuan kan hnam leh sakhuain dan leh hrai, inkaihhruaina fel tak kan lo neihte min palzut sak mek a, an Candidate-te an tlin theihna turin BJP leh a thawhpuiten mipuite harsatna remchanga lain pawisa hmanga min run an tum leh mek. Lo in ralring ula, pawisa hmanga in hlutna leh dikna lei theih in ni ve lo tih lantir turin ka ngen che u ni,” a ti.
Pu Lalsawta chuan, “MADC area chhungah EE pawh in nei lo, Engineer In Chief pawh in nei lo, hnalian engmah in thawk ve thei lo, tih hi MNF thutlukna a ni a, chu chu MNF in a en dan che u a ni. Congress party chuan a ram neitu, a thatna tak tak duhtuten an thawh a, an neih a, an enkawl hi kan duh ber a ni. A chhiat a thata mawhphurtu in ni a, chu chu thuneihna in semzai kan duhdan a ni. Tunah hian rilru fim tak pu a, thutlukna dik leh fel tak siam turin hun kan la nei. Tanpui in ngaih laia Aizawlah an awm thup, in vote an mamawh huna in hnena awm ve chauhte hian an ngaihsak tak tak lo che u, in ngaihsakna dik a ni ngai lo. Hetiang hi nangni nen kan tih reh a, kan ram hi kan siam a, that loh theih lohna bawm kan siam thuai a ngai a ni,” a ti bawk.
“Congress chuan tuna mipuiin harsatna nasa tak in tawh mekna Health Care hi kan siamtha ang a, a hma ang khan mumal takin kan kal pui leh dawn. Mipuite tan Eizawnna ngelnghet, kuthnathawktute leh thalaite kal kawng tur pawh mithiamte nen ruahmanna siam tura hmalak a ni ang. Tirhkoh Paula pawh Kristian tiak tir te suat a, rawt chimih tum thin a ni. Mahse siamthar a ni a, a danglam hnuah Lalpa tana sipai rinawm tak a lo ni ta. Keini pawh ram mipui duhthusam kan ni lo mai thei. Mahse nasa takin kan in siam thar a, kan danglam a, ram tana hnathawk turin kan in peih a, rinawmna taimakna, dikna kalpui turin kan in peih tawh. Chutiang tlin lo te tan chuan hmun a awm lo,” a ti bawk.
MPCC Treasurer leh CLP Leader ni bawk Pu Zodintluanga Ralte chuan Congres party chu a din atanga hnam tlem zawk (minority) te ngaihtuah thin, mi retheite hmangaihtu leh ngaihsaktu a ni. Mizoramin harsatna a tawh apiangin mipui kaltlangin Pathianin Congress party a tungding leh ziah thin. Kum 20 tal tap Mizoram chu tah leh hathialnaah MNF-in min hruai lut a. Remna leh muanna atan Kohhrante leh Congress party-in theihtawpa hma lain, mahni lal thutthleng pawh a kian a ni. MNF sorkar hmasa (1998-2008) chhungin Mizoram a ral muang lo. Khawpuiah hel an huangtau em em a, Aizawl khawpuiah hel pawlin training te an nei hial a ni. Mipui pawisa in mipui a thleng phak lo a, mipuiin sum leh paiah harsatna namenlo an tawh lai leh hripui avanga an dinhmun a chhiat em em laiin Chief Minister-in a unaute pawisa nuai tam tak a kawl sak a ni. Hetiang dinhmun him lo leh manganthlak tak laka sum leh pai dinhmun siamtha a, ram mipuite manganna chhanchhuak turin Pathianin Congresss party a tungding leh mek a ni,” a ti bawk.
Pu S. Hiato, Ex-Minister leh tuna Mara District Congress Committee President pawhin thusawiin, MADC a sorkar mek congress chu MNF in namthluk tuma an beih reng avangin anmahni inchhanhimnan BJP an zawm ta vek a. Tun MADC inthlanah Zero atangin bul kan tan ngaih phah, tih sawiin, “Dotu lian tak tak, sum leh pai leh thlemna tinreng hmachhuan, MNF Minister leh Union Minister-ten Mara ram an chamchilh a. Tlin beisei si lo, midang tihchhiat tumin ZPM an hmanhlel bawk. Mahse he MADC hmangaihtu leh chhantu Congress Party chu Pu Lalsawta hovin nasa takin Pathianin a dinthar leh mek a ni,” a ti.
Congress Party street campaign-ah hian President Pu Lalsawta bakah Pu Zodintluanga Ralte, MLA, Pu Lalrindika Ralte, MLA, Pu K.T Rokhaw, MLA, Pu H. Rohluna, Pu S.Hiato, Pu Lalrobiaka leh Pu H. Zothangliana, Pu Chalrosanga Ralte leh MPCC hruaitu dang thahnem tak an tel a ni.
