Congress Party-in Mizoram chhim lam fang a, ‘Chhim Hrut Fehchhuah’ hun a hman mekah vawiin, March 24, 2022 zingkarah Siaha Traffic Point-ah vantlang inkhawm buatsaih a ni a, hruaitu engemawzatin thu an sawi.
He hunah hian Pu Lalsawta, MPCC President chuan thu sawiin, “Pu Lalsawta Finance Minister a nih laiin hnam tlem zawk Minority-te a duhsak ngai lo’ tiin tun hnaiah helaiah min lo sawi a ni awm a. A sawitute hi lungrual taka kum tam tak kan lo thawhpui tawh thin, kan duhsaknate pawh lo dawng tawh thin an ni a, pawl danga an awm tak avanga tha lo an tih leh tak thutte zinga ka tel hi a mak ka ti hle. Kan hun laia rem leh rem lo, awm lo chung chung pawha District Council kan duhsak thin dante kha an la hre ve reng thovin ka ring. Kawr dang an hak tak avangin kan sual ta thut, kan ngaihsak lo ta thutah an ngai ta a ni ber mai. Congress President ka nih avangin ka sual thut lo ang, hnam tlem zawk, minorities-te ka hmangaih loh thut hi ring suh u” a ti.
MNF chu that theih lohna bawm ni a sawiin, “MNF sorkar hi that theih lohna bawm a niin ka hria. MNF sorkarah chuan huaisen takin, dik takin ding dawn se, an MLA leh MDC-te tan hian a awm theih tlat loh. Aw an chhuah a rem lo, thudik an sawi ngam hek lo. MNF sorkarah thil dik lo a tam em em chunga an mi tha tak takte an ngawih thuap nachhan chu that theih lohna bawm MNF-a an awm vang a ni. Congress Party kan sorkar a nih chuan kan kalphung a dik dawn avangin a that loh theih dawn loh. Sorkar tha, that loh theih lohna bawm, mi corrupt-te leh mi pamhamte tana awm hleihtheih lohna sorkar kan siam dawn. Hetiang sorkar hi din kan tum a, kan hotu, ka thawhpuite – Vice President, Treasurer, Gen. Secretaries leh hruaitu dang zawng zawngte pawh hian chutiang sorkar din chu an phur em em a, an inhuam em em a ni. Tunhmain hetiang lo zawnga min lo hmu thin in awm a nih pawhin min en rawh u, Congress Party hi nasa takin kan danglam tawh a ni,” a ti.
“Pu Lal Thanhawla hruaina hnuaiah minority-te nen lungrual takin kan lo thawk ho tawh ṭhin. Kan hma lawkah MADC inthlan lo awm turah pawh hian khawngaih taka min thawhpui leh turin Mara District mipuite ka sawm che u a ni. Mara DCC President ni mek, Cabinet Minister hlui Pu S. Hiato-a’n chawlh a tum thu min hrilh a, hetiang taka mi ropui, ram tana hna tam tak lo thawk tawh chawl tur hi hriatthiamna thui tak nei mah ila, kan ui em em a ni. Chutih rualin, MLA election 2023-a Siaha biala ding tur mi thar tha tak kan zawng dawn a, kan hmu ngei dawn niin ka hre bawk a, ka lawm hle a ni,” a ti bawk.
Pu Lal Thanzara, MPCC Vice President pawhin thu sawiin, “Congress Party-in kan ti ang kan tih chu kan ti mai thin. Rangva kan sem ang kan tih khan tuman an awih lo, mahse, kan sem mai. Ram buaia kum 20 kan awm hnuah Congress sorkarin thuneihna a ken avangin inremna a awm leh bawk. NLUP cheng nuai 1 kan sem ang kan ti a, kan sem leh mai, dinchhuahpui pawh tam tak an awm a ni. Tunah that loh theih lohna bawm, sorkar kan siam dawn kan ti a, thutiam hlen thin kan nih angin kan siam leh mai dawn. MNF-in cheng nuai 3 sem an tiam ve a, vawiin thlengin nuai 3 dawng sawi tur an la awm lo. Politics hi dawt sawina tur a ni lo. Sorkar duh vang ringawta duh duh tiam ringawt tur a ni lo. Tin, Kristian kan nih angin Kristiante tana harsatna nasa tak siamtu, Hindu sakhaw behchhana din BJP hi kan thawhpui a thiang lo,” a ti bawk.
Pu Zodintluanga Ralte, MLA & Treasurer chuan, “Opposition Party-a mi thar 3000 chuang an lo lut duh hian MNF sorkara mipuiin rinna an nghah tawh loh zia a ti langchiang hle a ni. He ramah hian rorelna tha a awm thei lo, a chhan chu hruaitu lu ber a dik loh vang a ni. MNF MLA zingah hian mi tha tak tak an awm, mahse a lu ber a dik tlat lo a, that theih miah lohna bawma an awm miau avangin an tha hleithei bik lo a ni. Keini chuan, ‘CM ka nih chuan ka Minister leh MLA-te zingah eirukna leh hlemhletna lama mualpho an awm chuan ka ban ang,’ ti ngam President, CM candidate kan nei a, kan danglam nasa hle ang,” a ti.
Pu Lalduhoma chungchang sawiin Pu Zodintluanga chuan, “Pu Lalduhoma kan sawisel ve hlek hian dem kan hlawh thin a. Amaherawhchu, amah Pu Lalduhoma ber hi thil zawng zawng sawiseltu a ni zawk. CM ni lai ngei pawh hmai hma a ‘Not normal a ni’ ti a sawikhum duh khawpa rilru hrisel lo a ni. A khingpuite hian a mimal chanchin kan la sawi ve ngai lo a, a political career chiah kan sawi thin. A mimal chanchin tha lo tak tak hi kan sawi ve palh ang tih hi hlauhawm tak a ni,” a ti.
Pu Ngunlianchunga, MLA pawhin thu a sawi a. Congress MDC member, BJP a lut tate chu Mara hnam hmangaih vanga lut an ni lo, thuneihna duh vang chauha lut an ni a ti a. “Politics-in a tum hi hmasawnna chauh a ni lo, kan hnam, kan ram, kan custom-te hi a him tur a ni. Mizo National Front-ah hian Mara Hnam himna a awm lo. Mara hruaitute nawrchhuah sa hnathawh tur pawh Mara mite thawh phal lo a, Kamrula thawh tir duh zawk tlattute hian Mara hnam hi an hmangaih reng reng lo. District Council-te kut liau liaua awm Elementary school pawh Samagra hnuaiah min chhuhsak vek. Heti chunga MNF-a la awm duh in awm hi a mak ka ti. Heti taka min sawisatu Party hi kan chawinung zel dawn em ni? Tin, BJP MDC-te hian Sixth Schedule amendment an rawn zuar leh dawn. Keini pawhin kan duh ngawih ngawih, BJP-ten an tih hlawhtlin duh miah loh a ni. Chuvangin, thutiam lem hmanga BJP hi an rawn inzuar leh a nih pawhin lo awih reng reng suh u,” a ti.
Siaha-ah hian dar 1:00 PM-ah Congress Bhavan-ah Party inkhawm buatsaih a ni a. He hunah hian Pu Lalsawta, President, MPCC chuan Pu N. Chakhai, MCS (Rtd) chu Congress Party-ah lawmlut bawk.
