Vawiin May 6, 2022 hian Congress Bhavan, Aizawlah MPCC Friday Political Session neih a ni a, Pu Lalsawta, President-in thu a sawi bakah India rama rawngbawltu lar tak, Rev. Dr. LR Colney, Mizoram BJP Vice President lo ni tawh chu Congress Party-ah lawmluh a ni. Friday Political session hi Pu KVL Siamkima, Gen. Secretary, MPCC-in a kaihruai a, report hrang hrang ngaihthlak a ni bawk.
He huna thusawitu Pu Lalsawta chuan tlawmna nen Politics khelh a ngai tih sawiin, “Congress Party hi chapo taka kal tur kan ni lo a, tlawmna nen, mipui rawngbawltu kan nihna angin kan kal tur a ni. Congress party hruaitute leh member zawng zawngte chu khawi hmunah pawh dawhtheihna leh tlawmna nen kan nung tur a ni a, midang tana harsatna siamtu ni lovin, tanpuitu kan ni zawk tur a ni. Congress chu thil tak tak duh mi, hmasawnna tak tak thlentu ni a min hriat avanga miin ‘Congress nge nge’ an tih thin hi kan vawng nung reng tur a ni a, a thaichhe zawngin tumah kan khawsa tur a ni lo,” a ti.
Pu Lalsawta chuan Orissa a rawngbawltu lar tak, chanchintha hrilna kawnga thawh hlawk em em Rev. Dr. LR Colney chu Congress Party leh Mizoram tana theihtawp chhuaha hnathawk turin a lawmlut a. Rev. Dr. LR Colney pawhin thu sawiin, “Mizoram siamthat duh vanga politics a lut ka ni. Mizoramah CM atana tha tur kan inzawrhsiak mek a, Pu Lalsawta hi CM atana tha ber turah ka ngai. Mizoramin sum leh pai harsatna nasa tak a tawhna karah tha tak sum leh pai enkawl thiam, eirukna a fihlim Pu Lalsawta hi Mizoram mamawh chhanna a niin ka hria a, a fit ber ka ring bawk. Pu Lalsawta hi mi retheite tana innghahna tlak, Zofate tana Josefa buhzem siamtu tura Pathian ruatah ka ngai a ni,” a ti. Vawiin a Friday Political session-ah hian Rev. Dr. LR Colney bakah Pu Lalthianghlima, College veng leh a chhungte voters 5 Congress Party-ah lawmluh an ni bawk.
