Vawiin ni 26th August, 2022 (Zirtawpni) khan Aizawl South II Special Block Conference, Zawlbuk, Thakthing Veng, Aizawl-ah hman a ni a, MPCC President Pu Lalsawta’n a hmanpui.
MPCC President Pu Lalsawta chuan, Congress Party hian Mizoramah ram rorelna tha, mipui leh Kohhrante duh dan ang neih hi neih kan duh tih sawiin, Pathian min pek ram leh Mizoram mipui hi ram dang aia chhia leh nep a ni bik loa, dinchhuahpui kan tum a ni. Hetiang vang hian Congress hruaitute chu Minister leh MLA nih vanga sum ngah aia retheih thlang, kan rawngbawlsak mipuite retheih leh harsat zia hriaa inpe turin kan inhlan mek a ni, a ti a. ‘MLA hlawh a tam tawk, Minister hlawh a tam tawk, hei bak duh belhna rilru pu hi ram leh hnam hmelma a ni. Chawm bawk, hawp bawk lam a ni lo, rawngbawlna a ni’, a ti.
Sorkar hna indaih loh chungchang sawiin, khawvel ram changkang ber berah pawh an in daih chuang lo. Loneitu, kuthnathawk leh thalai tam takte tan eizawnna ngelnghet buatsaihsak hi ngaih pawimawh ber a nih tur thu a sawi a. Thlai thar chhuah tam leh ran vulh tam te, dik taka sumdawn leh a hralhna rate pawh mi dang el pha a ngaih avangin Cooperative Society, PACS, Contract Farming, SHG, MSME te hmangin kan ram hi a tih hausak theih a, a dinchhuahpui theih. Consultants tha leh rintlak hmangin Singapore, Vietnam, Bangladesh te an dingchhuak angin kan neih sa leh kan taimakna hmangin ram hausa kan ni thei, a ti.
Pu Lalsawta chuan, eizawnna ngelnghet siam kawngah Environment leh Mihring rilru leh nun ti chhe zawnga hmalak a tha lo. Hmasawnna hi thlen tir angin hre mah ila, mihring rilru leh environment a chhiat si chuan hmasawnna tluantling a ni ngai lo, a ti a. ‘sum awlsam leh thawk lova sum hmuh do tlat a tul tih sawiin, sorkar sum hi mipui sum a ni a, a zahawm a, a enkawl (Financial Management) pawh nasa taka zir ngai a ni. Sum hman thiam loh leh a dik lova hman vangin sorkar lo piang leh tur leh mipui tan phur rit leiba lo siam vak theih a ni a. Leiba hi mipui thawhkhawm bawka rulh ngai a nih leh dawn tho avangin Sorkar sum enkawl (Financial Management) tuten an zahin an fimkhur tur a ni’, a ti.
Management hi Sorkar viak tha leh rintlak siamna bul ber a ni a. Minimum Government leh Maximum Government Mizoramah a tih theih a ni, tih sawiin Pu Lalsawta chuan, Thuneihna Insemzai (Decentralisatiion) Mizoramin a mamawh tak zet tawh a, Keini aiin mi dang hian tha zawkin an ti thei tih leh midang rin ngam hi chak zawk, rang zawk leh tha zawka ram hmasawnna thawhna tura thil pawimawh a ni ti hriaa ram rorelnaah thuneihna insemzai uar kan tum a ni, a ti.
Pu Sawta chuan, ram hruainaah hian sum um loh leh mahni inpekna hi a pawimawh ber a. Ram hruaitu kal ta Pu HK Bawihchhuaka leh Pu C. Pahlira te hi Lee Kuan Yew, YS Parmar, Navin Patnaik, Kejriwal leh Nitish Kumar te aiin an nep chuang lo. Ram tan an inpe a, mimal hausak hi an tum ber lo va, an tum erawh an hlen a ni. Pu Bawihchhuaka phei chu 1957-1960 chhung Mizo District Council Secretary a ni a, Mizoram hun thim lai ber 1965-1970 chhung District Council CEM a ni bawk. CEM aṭanga a chawlhin, “ka in” tihtur pawh a nei lo mahse, ani chuan, ‘Ka lal lukhum’ a ti thei a ni, a ti.
Ram hruaitu, ram hruaina kawngah ngaihtuahna danglam leh nghet neih hi a pawimawh lai chu a ni. Chumi atan chuan kan ram siam tha turin kan rilru leh ngaihtuahna a in peih a, chumi atan thil hlanah kan inhlan a ni…” a ti bawk.
MPCC General Secretary Pu Joseph Lalhimpuia, Pu John Siamkunga General Secretary, Lt. Col. ZS Zuala, President, Upa Wing, MPCC leh Pu RL Pianmawia ten thu an sawi bawk.
Aizawl South II Block Special Conference hian Resolution pahnih :
1. Kan ram kan hnam kan Sakhuana tluchhe mek tung ding a, siamtha tur leh dinhmun harsa rahbi tleu tawhte tana belhtlak thutiama ding tlat thin Congress Party Pu Lalsawta kaihhruai hi kan Ram dinhmun siamtha leh turin kan ring tawk a, zui tlak kan ti.
2. Ram tana rotling tam tak min siam sak tawhtu, ram hmasawnna ngai pawimawh thalaite hmakhua ngaia hmathlir thui tak nei Congress party hi khawvel thang zel mila kan ram leh hnam kaihruaia danglamna thlen turin kan ring tawk a ni.
He hun hi Pu J. Lalbuatsaiha, BCC, Vice President, Aizawl South II in a kaihruai a, Pi Mary Zorammawii, Joint Secretary, Aizawl South II in hunserh a hmang a, Aizawl South II ah hian Unit 22 a awm a ni.
