Vawiin September ni 8, 2023 hian Congress Party chuan kartina an lo tih thin danin Congress Bhawan Golden Hall-ah Friday Political Session neiin he hunah hian MPCC Vice President atana an ruat thar Pu Lalnunmawia Chuaungo, IAS (Rtd) chuan thu a sawi.
MPCC Vice President, Pu Lalnunmawia Chuaungo chuan, Mizoram chu hun rei tak ram buaiin kan awm a, khatih laia kan ram mamawh ber chu remna leh muanna a ni a. Congress Party-in kan sorkar a nih chuan remna leh muanna a awm ang, an ti a. Remna leh muanna kha congress in a thlen ta a ni. Congress Party in a hunlaia thil ropui a tih hi kan thalaiten an lo hriat atan ka duh a ni. Tunah hian Mizoram hian thil hlauhawm kan hmachhawn leh mek. Hnam tlem zawk leh Sakhaw tlem zawkte che thei lo va min siam hi BJP thil tum ber a ni a. Manipur-ah hleihnei takin ro an rel a. A tuartute chu kan unaute an ni. Central sorkarin a tih tur a ti duh miah lo va. Sakhaw zalenna pawh tih chhiatin a awm mek a. Hnam hnufual zawk leh tlem zawkte dinhmun hi BJP sorkar hnuaiah a him lo a ni, a ti.
MPCC Vice President chuan, BJP te’n Hindu ram zauh zelna tura an hmalakna ah hian Manipur-a kan unaute hian eng chen nge a tawrh dawn tih hriatthiam a harsa a ni. Jammu & Kashmir State inhumhimna turin Constitution-ah dan tha tak nei mahse, an inhumhimna chu BJP in chhut chhiat sakin UT ah pawh UT chhe mi an pe a. Jammu & Kashmir hi India rama Muslim State awm chhun a ni a. Tunah chuan Muslim State a awm tawh lo. Kristian state hi Nagaland, Meghalaya leh Mizoram te a ni. Mizoram chu, ILP in kan inhum him a, nimahsela, min rawn thiah sak ta se eng nge tih theih kan neih. Manipur-ah khian tun lai khawvela thil thleng thei lo a thleng tlat. Khawvel mithmuhah India chu mualpho viau mahse engahmah BJP sorkar hian a ngai lo, a ti.
Mizoram Chief Secretary lo ni tawh Pu Lalnunmawia chuan, Kum 2019 February ni 19 khan Assam Rifles te hi kan Police te thuneih ang hi Home Ministry khuan a lo pe ve thlap. Law & order hi State sorkar thuneihna a ni chungin Assam Rifles te eng nge an pek ve ngawt. Kei ngei pawhin an order chhuah tawh chu withdraw turin Home Ministry lehkha ka ziak a, engah mah an ngai lo. Mizo mipuiten kan huat leh kan duh loh em em hi Assam Rifles te hian rawn ti ta se tih theih kan nei dawn lo. Keini Kristian te chuan Charity ah hma kan la nasa em em a. Foreign atanga tanpuina Damdawi In leh School dinte hi an ngaimawh em em a. Tin, India institution ropui tak taka Principle leh Dean atan an mahni mi leh sa, Hindu kulmuk dah an ching hle a ni. Kan sakhua hi nasa taka nekchep an tum a, an nekchep mek zel a ni. Kan missionary te pawhin tun hma angin rawng an bawl thei tawh lo. Chuvang chuan, nakum Lok Sabha inthlanah Congress leh a thawhpuite an Sorkar leh ngei ngei angai a ni, a ti.
Pu Lalnunmawia Chuaungo chuan, Central-a BJP te chakna ti tawp turin kumin a State 5 inthlan hi a pawimawh dawn a. Chung zingah chuan Mizoram General Election pawh a tel. North East-ah BJP leh a thawhpuiten sorkarna an chang vek. India rama Congress a thawhkan leh theihna tur atan Mizorama Congress an sorkar a ngai a ni. Congress lo chu kan ram, kan hnam, kan sakhua min humhim sak theitu tur an awm lo. Chumi humhim turin congress kan sorkar leh angai a ni, a ti.
Pu Lalnunmawia Chuaungo chuan, Sorkarah hian a hruaitu Chief Minister hi an pawimawh em em a. Khawvel ram changkangte hian hruaitu tha an neih avangin dinhmun duhawm zawkah an awm phah thin. Thil siam that theih loh a awm lo. Mizoram pawhin hruaitu tha kan mamawh a. Congress party chuan chutianga ram kaihruai tha thei tur hruaitu kan nei a. He ram kan siam that theihna turin congress kan sorkar a ngai. Kan ramah thalai ruihhlo ngai an tam. Kan NGO leh Kohhran te inpekna a ropui. Nimahsela, Sorkar tha kan neih miau loh avangin Kohhran leh NGO te hmalakna hian duh angin kawngro a su chak thei lo. Singapore sorkarin a theih hi Sorkar tha kan neih hunah kan ti ve thei em em ang, Kuthnathawktuten an thlai thar hlawk zawka an hralh theihna turin sorkar tha kan mamawh. Mahni kutkawiha eizawngtute dinhmun chawikang turin Congress Party kan sorkar angai a ni, a ti bawk.
