Vawiin khan Golden Hall, Congress Bhavan, Treasury Square, Congress Party chuan Aizawlah kum 2023 MLA General Election atana Congress Party Manifesto No. 1, “Ṭang Puihna” chu an zirho a. He hun hi Lal Thanzara, MPCC Vice President leh Chairman, Manifesto Drafting Committee ni bawkin a kaihruai a ni.
Lalrinmawia Ralte, Ex Minister, Secretary, MPCC Manifesto Drafting Committee ni bawk chuan Manifesto Ṭang Puihna sawifiahna & sawizauna hun a hmang a. Zawhna leh chhanna hun zau taka hman a ni bawk.
He hunah hian C. Chawngkunga, Ex Minister pawhin a vei zawng, hun kal tawha sorkarin Loneitute tana ruahmanna a lo siam tawh thinte a hlawhchham thin dan te, a hlawhchhamna chhante sawiin, “Tihhlawhtlin ngei ngei tur chauh Manifesto kan nei tur a ni a, mipui kan bum tur a ni lo. Kan policy hi mipui tibeidawngtu a ni tur a ni lo,” a ti. Congress Party Manifesto hrang hrangte hi a tahtawla tlangzarh zel tur a ni.
Manifesto No. 1, Ṭang Puihna a tarlan tlangpuite chu :
1. He Ṭang Puihna hnuaiah hian dinchhuah tum tak taka ṭan late hnenah ṭanpuina leh chhawmdawlna cheng nuai bi aṭanga hnathawktute mamawh inṭawm eg. Tuizem, kawng, tuilakna, godown, a sawngbawlna, etc a nih chuan vaibelchhe tel thlengin pek a ni ang.
2. Kuthnathawktute tan thlai thar phurhchhuahna tur feh kawng ṭha zawk siam sak an ni ang a, thlai chin tamna hmun bik area siamin, dah ṭhatna tur, a hralhna tur leh a sawngbawlna thlengin siamsak an ni ang.
3. Thlai chingtute leh a leitu tur (company/sumdawng) ten indawrna rintlak tak, innghahna tlak an neih theih nan hmalak a ni ang. Thlai hralhna leh a kalphung engkim duanga viltu tur fel taka siam a ni ang a, hetiang a hman tur Dan pawh felfai taka siam a ni ang.
4. Mahni a bul ṭan ngaihna hre lote training pein, kawng ṭha zawk siam sak an ni ang.
5. Ṭhalai, eizawnna nei mumal loten eizawnna ṭha zawk an neih theih nan nasa taka ṭanlak a ni ang a. An eizawnna tur atana pawimawh training chi hrang hrang buatsaih ṭhin a ni bawk ang. Sumdawnna bul ṭan duhte tan Entrepreneurship development lamah uar taka hmalak a ni ang a, tunlai eizawnna kawnga pawimawh em em computer zirna leh tawng zirna changtlung taka kalpui a ni bawk ang.
6. Mi vanduai bikte, rilru leh taksa lama harsatna neih vanga ṭan la ve thei tawh lote, dinhmun harsa lehzuala dingte enkawlna tur (social security scheme) ṭha tak siam a ni ang a. Heng mi harsa zualte an dam loh nikhua a inenkawlna turte, ei leh in, chenna in leh zirna lam thlenga tanpuinate hei hian a huam ang.
