Vawiin August 15, 2022 hian Congress Bhavan, Aizawlah India ram Independence cham vawi 75-na lawmna hun hman a ni a. Chawhma dar 11:00 khan Congress Bhavan kawtah India Flag pawh pharhna hun hman a ni a. Flag hi Pu Lalsawta, President, MPCC-in a pawt pharh a ni. Flag pawh pharh zawh hian Golden Hall, Congress Bhavan-ah Independence Day lawmna programme hman zui a ni a. He hun hi Pu RL Vala, Gen. Secretary, MPCC in kaihruaiin Pu Vanlalzuiliana, President, ADCC-in hunserh a hmang a, Johan H. Lalmalsawma’n zaiin mipui a awi bawk.
Thu sawitu Pu Lalsawta chuan, “Kum 1600 chho vel atangin India ramah East India Company an lo lut tan a, a tawpah phei chuan India ram pum chu British rorelna hnuaiah kan kun ta hial a. India ram ropui tak leh mipui chhuanawm tak takte ram dang awpna hnuaia kan awm reng mai kha kan hruaitu hmasaten dik an ti thei ngang lo a, nasa taka hma lain kum 1947 August 15 khan India ramin Zalenna a nei thei ta a ni. Hnam hrang hrang leh sakhaw hrang hrang zuitu mi vaibelchhe tam takte ram rorelna pakhat hnuaia kan awm thei hi a ropui takzet a. A hunlaia mithiam tam tak phei chuan rei kan awmkhawm theih hi an ring lo reng reng a, mahse kan thei tlat si. Communist Lalpa, Russia Premier Khrushchev-a, Pathian awm ring miah lo pawhin ropui a ti lutuk a, ‘India rama ka zin atangin Pathian awm ka ring ta,’ a tih phah hial a ni,” a ti.
Pu Lalsawta chuan ram hruaitute pawimawh zia sawiin, “Khawvela ram hrang hrangte hi Pathianin thil pahnih – ram leh mipui min pe vek a, a enkawltute a zirin nasa takin a danglam thei. North Korea chu a enkawltu ram hruaituten an zir loh avangin khawvela ram hrehawm berte zinga ngaih a ni. Chutih laiin an thenawm South Korea erawh chu khuanzinte tlawh chak em em, khawvela ram nuam leh zalen berte zinga mi a ni. Heng ram pahnihte thil neih hi a inang deuh vek chungin an dinhmun a inthlau em em a ni. A enkawltu pawimawh zia hei hian a tarlang chiang hle a ni,” a ti.
Mizoramah Congress a sorkar leh ngei ngei a ngai tih sawiin, “Kum 20 chhung ram buai vangin mi state hnungah tlai taka kan kal ve chungin tunah chuan state dang kan tluk chho ve tan ta. Heng hmasawnna tam zawk hi Congress tih a ni. Duhthusam leh sawiselbo erawh a ni lo tih kan hria. Kan ram kal tawh dan en ila, Congress hian siamthatna kan thawh leh a ngai a ni. MNF-in Mizoram an sawp chhiat nasat zia kan hria, hemi sawi nan hian Minute khat pawh ka ui tawh. ZPM hi mi tam takin an rin tlat loh avang hian kum 2023 inthlanpui lo awm turah hian rilru dik leh fel tak puin, rim tak leh hah takin Pathian malsawm tlaka thawkin, tum thuhmun nghet tak nen a chhe lai siamtha tura tih tak zeta kan thawh chuan he ram hi kan siamtha thei. Chutiang tur chuan theihtawp chhuah turin Congress mipuite ka sawm a, chu chu Mizoram mipuiin min beisei dan pawh a ni,” a ti.
Independence day lawmnaah hian Pu Lalrindika Ralte, MLA chuan lawmthu sawina hun a hmang bawk.
