Vawiin July ni 7.7.2023 (Zirtawpni) hian MPCC Campaign Committee huaihawtin Lal Thanhawla Auditorium, Congress Bhawan Aizawlah Mi thar lawmluh hun hman a ni a. MPCC President Pu Lalsawta’n mi thar Pu R. Lalrinmawia, CEC & Chairman Sports Sub Committee, Central YMA, Sunrise Hardware, Ramhlun North, Pu Vanlalruata Chenkual, College Veng, Joint Director (Rtd) Horticulture Deptt. Pu Lalthanglura, Research Officer, Eco & Statistics Deptt,, (Rtd) Tlangnuam Vengthar leh Aizawl veng hrang hrang atangin voters 100 chuang a lawm lut nghal bawk.
MPCC President Pu Lalsawta chuan, mi tha tak tak, ram siamthat tum Pathianin min pe zel a. Anni lo pawh hi ram siam that duh leh Mizoram tana sorkar tha siam tum an lo kal leh dawn a. Tihfuh tum lova, zoram a khawvar tir tura lo lut, nihna leh ropuina duha lo lut ni lo, hnathawk tura lo lut an ni. Politician te hi pawikhawihtu, thil tha duh lo, duham leh corrupt-ah mi tam takin an ngai thin. Mahse hei hi Congress chuan kan thiat vek tawh. Vawiinah mualsira lo thlir ngawt lova, a taka thawh ve duh, ka thawh lohin tunge thawka siamtha ang, tih avangin Congress an rawn zawm a. Ram mipuite tan mi rintlak an ni, a ti.
Pu Lalsawta chuan, Mizoram chhunga hnam hrang hrang leh kan sakhua a him theih nan BJP sorkarna paih a ngai tih sawiin MPCC hruaitute leh AICC hruaitute inkawmnaah Mizoramah Congress party-in sorkar tha, a ram chhunga hnam leh sakhua humhimtu tur, BJP chakna leh pawisa it ve lo sorkar siam a tul a, chumi atan chuan India leh khawvel hmun hrang hranga thalaite ngaihsan rawn Rahul Gandhi pawh Mizoramah a lo kal thuai dawn. Congress Party hian Zoram mipuite tan sorkar tha kan tiam a. Politician mahni aia ram dah hmasa zawk te kan hnawl dawn a, Mizoram mipui pawhin hetiang mite hi hnawl turin ka ngen a ni, a ti.
Pu Lal Thanzara chuan, mi tha tak takin Congress Party an zawm chhan chu Pu Lalsawta hi a ni. Amahah hian Mizoram mipuiin beiseina thar neiin Mizoram tana sorkar tha a siam ngei an ring a. Aizawl leh Mizoram hmun hrang hrang atangin Pu Lalsawta hova sorkar tha siam duh te’n nitin Congress party an zawm mek a ni, a ti.
MANIPUR CHUNGCHANG MPCC RESOLUTION
“May 3, 2023 atanga kan thenawm State Manipur a Meitei leh Zofate inkara inbeihna thleng mek hi Congress party chuan a tir te atangin ngun takin a thli thlai reng a. He Manipur buainaah hian a phenah BJP sorkar thiltum ruk (hidden agenda) a awm ngei niin kan hria a ni. Kristian te Biak In tam tak suasam a, hal chhiat a nihnaah leh hnam tenau zawk te rawtchimih tum a, thiam tak leh rawng taka hmalakna kal mekah te hian Manipur BJP sorkar hi thuk takin a inrawlh ngei tih hi Congress party ngaihdan leh hmuhdan a ni.
Hetiang thil rapthlak tak, India ram inpumkhatna thlenga tiderthawng thei a thlen mek laia Prime Minister Narendra Modi an India khua leh tuite thlamuan tura tawngkam khatmah ala chhakchhuak duh lo hi hriatthiam theihah kan ngai lova. He buaina hi a rang thei ang bera hmehmih a nih theihna turin Sorkar laipui thachakna hmangin, chak taka hmala nghal turin Prime Minister Narendra Modi hi kan phut bawk a ni”.
He hun hi MPCC Vice President Pu Lal Thanzara’n a kaihruai a. Pu Lalhmingthanga Pachuau President ADCC in hunserh a hmang a. Pu R. Vanlalvena, General Secretary, MPCC chuan lawmluhte chanchin tawi sawiin, lawmluh thar te aṭangin thusawi ngaihthlak a ni bawk. He hunah hian MPCC Media Chairman Dr.Lallianchhunga’n Manipur buaina chungchang Resolution a putluh chu pawm (passed) a ni bawk. Campaign Committee Chairman, Pu RL Valla’n kalkhawmte hnenah lawmthu a sawi a. Pi Lalenkawli Pautu, Nl. Rachel Lalnunkimi leh Nl. Lalthlengliani Jongte te an zai bawk.
