Vawiin ni 22.2.2023 (Nilaini) chhun dar 12:00 khan Congress Bhawan Golden Hall-ah Seminar neih a ni a, Lalrinmawia Sohnel Speaker atan sawm a ni. Hemi hunah hian ‘Ram leh Hnam Humhalh’ tih thupuia hman a ni.
Lalrinmawia Sohnel chuan, “Rukru ringawtah hnam khat hi min siam ka ring lo,” a ti a. Kan rama sualna lian ber hi ruihhlo a ni lo a. Eirukna hi sual ka ti zawk. Eiruk nasa lutukin ruihhlo hi a ken tel a ni zawk, tih sawiin, he ram hi kan ta a ni a. Nang leh keiina kan hmangaih lohin tunge hmangaih ang. Kan level theuhah ram kan hmangaih thei a ni, a ti.
Lalrinmawia Sohnel chuan, “Tul lovah tui a liam pur pur a nih chuan ka off ang a, midangin an chang tam ve mai tur a ni. Truck atanga lung unload-tu pawhin ram a hmangaih a ngai a ni,” a ti a. PWD engineer-te chuan hna an thawk chhia kan ti lo a. Mahse, inenkawl kawng a chhe lutuk. Kan ngaisang lo che u. Ram dinhmun a him loh chuan himna zawngin mahni ramah kan haw thin. Japanese ho hian Mizo ho hi pemna tha deuh an hria a ni ang, an ram an tiduhdah em mai, an ti thin a. Vairengte kan pelh dek dek chuan vanrama misual lut tur ang mai an ti thin. Ramdanga kan pem loh tur zia chu. Covid-19 lai te pawh khan mahni ram, Mizoramah a ni an rawn haw tih sawiin, hei hi kan neih chhun, kan ram a ni a, a hlu ber a ni, a ti bawk.
He hun hi Lalremsangi, Secretary MPCC chuan kaihruaiin, sawihona leh zawhna hun hman zui a ni a, Congress Party member kalkhawm ten hlawkthlak an ti hle a ni.
