Nimin,November ni 30 ,2022 khan Congress party chuan Congress Bhavan, Aizawl-ah ‘Thuneihna Semzai’ chungchang zirhona an nei a. He hun hi Lalremsanga Secy. MPCC in a kaihruai a, Dr. Lallianchhunga’n ‘Thuneihna Semzai chungchanga sorkar kal tawh te hmalakna hrang hrang leh hmachhawp la awm te’ zawi hawnna a nei.
Dr.Lallianchhunga chuan, “Thuneihna semzai (decentralization of power) hi ram hmasawnna atana rahbi pawimawh berte zing a mi a nih bakah, mipui sorkar (democracy) sawhnghehna atana a kila lung pawimawh berte zing a mi a ni a. Mipui tan tel vena tur a siam tam a, langtlang (transparent) takin thil a tih loh theih loh va, chu chuan eirukna (corruption) a ti tlem a, ramin hma a sawn phah thin a. Sorkar tha siam tur chuan thuneihna semzai hi tihhlawhtlin ngei ngei ngai zing a mi a ni” a ti.
Mizoramah Notified Town 23 a awm tih sawiin, Dr.Lallianchhunga chuan, “Notified Town zingah Lunglei-ah Municipal Council din theih a ni a. Municipal Board hi Mamit, N.Kawnpui, Vairengte, Kolasib, Sairang, Saitual, Khawzawl, Champhai, Serchhip, Thenzawl, Hnahthial, Lawngtlai leh Siaha-ah te din theih a ni a. Mahse, tuna Aizawl Municipal Corporation (AMC) kal dan ang hi chuan khawpui danga Municipal sorkar din belh zel tur chuan mipui rilru hneh a harsa tulh tulh ang. Mipui tana remchang siam lo, an phur ti rittu anga Municipal sorkar hi an hmuh zel a hlauhawm khawp mai” a ti.
Dr.Lallianchhunga chuan, “Sorkar Laipui hian thingtlang leh khawpui Tualchhung Sorkar te hi a ngaipawimawh em em a. 15th Finance Commission hnuaiah Sorkar Laipui atanga an sum hmuh te chu an dawn atanga ni 10 chhungin state sorkarin Tualchhung Sorkar te hnenah a pe chhuak thin tur a ni a. hei hi a ti khawtlai a nih chuan a pung nen a chawi zel dawn a ni” a ti bawk.
AMC chungchang sawiin Dr. Lallianchhunga chuan, “Mipui phurrit tizangkhai tur leh mipuite tana dawr awlsamna tur kawng an siam thiam a hun tawh” tih sawiin, “Tunah chuan inzirchawpa kal a hun tawh lo, tawnhriat nei tawh Corporator te’n AMC an enkawl tawh avangin mipuite tana dawr awlsam tura AMC hi an siam thiam a hun tawh takzet a ni” a ti bawk.
Thupui thlan bik zirhona hi Congress party hian kartin Nilaini a piangin Congress Bhavan-ah an buatsaih thin a, a duh a piang tan he hun hi chhim ve theih a ni.
