Congresss Party kaihhruai SAKHAW ZALENNA DUHTU PAWL/ MIZORAM SECULAR ALLIANCE chuan vawiin khan Aizawl Press Club-ah chanchinthar lakhawmtute kawmin, “Kum 2014 a BJP in Central-a thuneihna a chan atang khan hnam tenau leh Kristian te kan chep sawt em em a. Kristian te nghaisakna, tihduhdahna a thleng chamchi a. Kan biak In an hal a, inkhawm thei lo turin Kristian te an rikrap a, Chanchintha hriltute chu an man a, mirethei te hnena ei tur an pek leh an tanpuiin, tihluihnain Kristian-ah thlem luh an tum an ti a. Case an filed a, kan Missionary te manin taninah an khung thin a, kan chep em em a ni.
“October, 2022 khan RSS a an hotu lu ber Mohan Bhagwat chuan, ‘India hi Hindu ram a ni tawp mai a ni, sawi buai theih a ni lo,” tiin a sawi a. Hindu lalram din turin an bei zel dawn tih an sawi bawk a ni. Kum 2022 khan RSS Volunteers mi 5,85,000 lai an awm a, India ram pumah Branch 57,000 an nei a ni. The Print chanchinbuin a chhut dan chuan tuna BJP sorkar-ah hian Narendra Modi telin, Central Minister pali zinga 3 chu RSS mi vek an ni tih a tarlang a ni. Modi-a sorkar hian RSS thil tum Hindu Lalram din turin chakna thahrui an nei tha tawk tih a chiang em em a ni.
“Kum 1925 a RSS an din tirh khan, an hruaitu hmasa ber Baliram Hedgewar chuan Italy rama Mussolini Party Facists an entawn a, chumi hmanga Hindu lalram din an tum a ni. India rama mithiam leh chinchang hriate chuan kum 1922-1945 a Italy rama Benito Mussolini an Dictator-a Italy ram a awp lui thut ang khan BJP hian thil an tih duh mai an ring a, an hlau ru em em a ni.
“RSS thil tum leh duh dan ti puitling turin kum 1951 khan Jan Sangh Party an din a, Sorkarna an la mai thei lova. Kum 1964 khan Hindu firfiak pawl Vishwa Hindu Parishad (VHP) an din leh a, an hlauhawm hle a. Kum 1977 khan Jan Sangh Party chu thiatin Janata Party an din a, Trade Union of India nen tang dunin Sorkarna an siam a. Kum 2 awrh chauh an sorkar a, bawng talh an khap a, an che na hman hle a ni. Kum 1980 ah tuna BJP hi an din ta a. Kum 1984 khan Hindu firfiak pawl Bajrangdal an din leh ta a. India ram hi Hindu lalrama siam tumin an bei ta ngar ngar mai a ni.
“Citizenship Amendment Bill siam an duh a, Parliament-ah an pharh a, Mizoram MP pawhin a thlawp zawngin Vote a pe anih kha. Danin a tum ber chu kan ram thenawma Hindu te, Buddhist te, Sikhs te, Jains te, Kristian te tih thlabara awmte India rama an lo luh theihna tura kawng hawn sakna a ni a. Mahse, keini Mizo Kristian te tan chuan CAA hian awmzia a nei lo. Bangladesh atanga Bangladesh sipaiten an rikrap, kan Mizo hnahthlak Kristiante lo luh tum chu India sipai BSF ten an dang bet tlat a, NGO te pawhin an pui chiam a, India sipai BSF ten an lo luh an phal chuang lo. Kristian Pastor pakhat pawh ram palailengah a boral ta anih kha. Zawimuangin min hual chep hret hret zel niin a lang.
“BJP chuan India ram pumpuia dan pakhat Uniform Civil Code (UCC) hman a duh a, chutianga ti thei tur chuan hma a la chho mek a. Keini Kristiante leh hnam tlem zawk tan chuan a hlauhawm em a ni. Kristian dana inneihna te, thil inrochun chunghangah te kan thu thei tawh dawn lo. Sakhaw lian ber leh tam ber dan hi kan hman a ngai dawn tlat a ni. Mi pawhrual an tum dan hi chu hnam tenaute chimral tumna mai niin a lang a ni. Kan hnam ziarang kan hum thei tawh lovang. Kan Kristianna pawh kan hum thei tawh lovang. Nikum 2022 December khan UCC Bill hi Private Member’s Resolution in Kirodi Lal Meena, BJP MP chuan Rajya Sabha-ah a pu lut a, Member awmten an Passed pui tawh a ni. UCC kan hman lohna turin BJP paihthla thei tur Party tangrual pawl kan vote a ngai a ni.
“Kum 1955-1958 chhung khan Hindu Code Bills passed a ni a. Hei hian Hindu sakhua atanga peng nia ngaih, sakhaw dan in zul takho, Jains, Buddhists, Sikhs sakhuate a huam a ni. Tichuan, he Hindu Code Bill hnuaiah hian Hindu Marriage Act te, Hindu Succession Act te, Hindu Minority and Guardianship Act te, Hindu Adoptions and Maintenance Act te chu passed a lo nita bawk a. In hnai tak vek an nih avangin an tan pawina a awm em em lo. Congress Prime Minister Nehru-a chuan Muslim te, Kristian te, Parsis te chu kan danglam em avangin he Code Bill hnuaiah hian min huam tir ve duh ta lo a ni. Chu chu ngaithiam lovin BJP chuan Hindu Code Bill hnuaia rinluh kan nih ve nan, Uniform Civil Code hman tumin a theihtawp a chhuah ta a, chu chu a ni kan do mek a chu ni.
“India ram hi Sakhaw zalenna ram a ni a, chu chu BJP te hian an duh lo a ni. Sakhaw zalenna tihchhiat tumin an bei a, hma an la reng a. Chu chu kan beihlet a ngai a ni. India Constitution siam lai khan a siamtuten Sakhaw Zalenna Secular tih hi Constitution-ah an lo dah tel lova. Chu chu hriain Congress Sorkar, Pi Indira Gandhi kaihhruai chuan kum 1976 khan, 42nd Amendment hmangin, India Constitution in nghahna lai ber, Preamble-ah ‘SECULAR’ tih hi alo dah khiau mai a, chu chu kan chhuan tawlawl ber a ni ta a ni. Chu amendment chu paih tumin BJP hian nasa takin tan an la ta a, amendment hmang vekin paih theih a ni tih an hria a, chumi dang tur chuan kan tanho a ngai tak meuh meuh a ni.
“Sakhaw Zalenna Secular tih paih tur hian Parliament-ah BJP in MP an ngah tawk tawh. An mamawh ber chu State sorkar, BJP sorkarna State 15 aia tlem lo an mamawh a ni. Chumi nei tling tur chuan an tang nasa a ni. An MP te chakna hmanga Parliament-a Amendment hmanga Sakhaw Zalenna Secular tih an paih chu, BJP lalna State 15 aia tlem lovin an lo pawmpui a ngai a, chutiang zat lo pawmpui tur BJP lalna State an awm chuan Sakhaw Zalenna chu kan chan dawn tihna a ni. Tunah hian BJP lalna State 11 a awm mek a ni. Chutiang chu thil awm dan anih avangin Mizo mipui, Kristian tha tak takte hi tangkhawm ila, kan Kristianna hnawk titu BJP leh a thawhpui Party te hi Election-ah i a hnawl ngam ang u.
“BJP chuan India hmarchhaka Kristian ram zawng zawngte chu Election hmangin a rawn la fai vek tawh a, a lak loh awm chhun chu Mizoram chauh hi a ni. Mizoram la tur hian min rawn beina hle dawn tih ring ila, pawisa a rawn hmang dawn, Development min sawihmuh nasa dawn, suma min puihna tur tam tak an rawn tawktarh dawn. Tin, kan vote lei an tum dawn a. Kan vote kan hralh a, BJP leh a thawhpuite kan Vote anih chuan Isua hralhtu, sum hmanga phatsantu Juda Iskarioata ang chiah kha kan ni tih pawm ila, meidilah kan tla ngei ang tih i ring bawk ang u.
“Kum 2014 a BJP a rawn lal atangin India rama Kristiante tawrhna a nasat zual zelzia hmuh hian awm mai mai thei kan ni lo. USA behchhana hmalatu Open Doors te, Global Christian Belief te, USCRIF tena India rama sakhaw thila tihduhdahna thleng zat an tarlan en hian hma kan lak a ngai a ni tih i hria ang u.
Kum 2016 chhung khan Kristiante tihduhdahna vawi 330 a thleng a.
Kum 2017 chhung khan Kristiante tihduhdahna vawi 440 a thleng a.
Kum 2018 chhung khan Kristiante tihduhdahna vawi 477 a thleng a.
Kum 2019 khan Kristiante tihduhdahna vawi 527 a thleng a ni. A tam chho tial tial a, an chenain an hlauhawm tial tial bawk a ni.
“BJP sorkarna apiangah Anti-Conversion Bill an passed zel a. Sakhaw dangte kan chep em em zel a ni. Chung Anti-Conversion Bill an passed a, dan anga an hmanna te chu:
1. Madhya Pradesh – 1967, Samyuk Vidhyayak Dal sorkar lai. CM Govind Narayan Singh.
2. Orissa – 1967 Swatantra Party sorkar lai. CM- Rajendra Singh.
3. Arunachal Pradesh – 1978 Janata Party lal lai. CM – Premma Thungan
4. Gujarat – 2003 BJP sorkar lai. CM-Narendra Modi.
5. Jharkhand – 2017 BJP sorkar lai. CM-Raghudar Bomai.
6. Uttarakhan – 2018 BJP sorkar lai. CM- Rowat.
7. Himachal Pradesh – 2019 BJP sorkar lai.CM-Jai Ram Thakur.
8. Uttar Pradesh – 2020 BJP sorkar lai. CM – Adytianath.
9. Karnataka – 2022 BJP sorkar lai. CM-Bommai(Kumin May,2023 khan Congress in sorkarna an chang a, Anti-Conversion dan hi an thiat nghal a ni).
“Kan ram thenawm Manipura Zohnahthlak chunga thil thleng leh Kristian biakin 357 lai an halchhiat te, in 4550 an hal te, khua 292 lai an hal chhiat vek te, mi za telin nunna an chan te leh thil thleng dangte en hian Kristiante hi ngawi mai mai tur kan ni lo.
“Parliament-a BJP Sorkar-in Zohnathlak Kuki te chu Myanmar atanga rawn lut rua Manipura buaina siam anga a sawi phei hi chu Foreigners anga dawta in puhna a ni a, a thalo tak zet a ni. BJP thil tum hi a rapthlak a, na taka kan beihlet a ngai a ni.
“Hmanni lawk khan Parliament-ah Forest Conservation Amendment Bill, 2023 chu passed a ni a. An passed dan ang chuan Mizoram pum hi Forest ram vek a ni dawn a, tin, kan ram chhung ngeiah hian a ram luahtute min rawn miah lovin, tha nia an hriat chuan Central sorkar in hma a duh dan angin a rawn la thei zel dawn a. Defence lam mamawh ang chiah te, kawngpui pawimawh zual bik an tihah te, sahuan siam an duhnaah te, eco tourism siam an duhnaah te a ram luahtu te min rawn lovin hma an duh duhin an rawn la thei dawn tihna a ni a, ram luahtute tan chuan a pawi tak zet dawn a ni. Chutiang dan laka kan fihlim theihna tur chuan BJP leh a thurualpui Party nilo kan thlan tlin a, he dan hi kan thiah a ngai a ni tih i hria ang u,” an ti.
