Vawiin, August 29, 2023 hian Dr. Lallianchhunga, MPCC Thupuangtu (Spokesperson) leh Chairman, Media Deptt. chuan Champhai South bial chhung a Jail Veng, Bethel, Vengthar leh Ruantlang a Congress Party Unit tlawhchhuahna hun a hmang a. Champhai South bial chhunga hman tangkai loha awm hmasawnna ruhrel, New Champhai a Cold Storage building leh Tlangsam a Polytechnic Building te a hmunah a tlawh nghal bawk.
Dr. Lallianchhunga chuan Pathian leh mipui zarah Congress sorkar chu a chhelai siamthatu alo ni tawh thin, a ti a, “Champhai South Bial chhunga hmasawnna ruhrel hman tangkai loh te hi Pathian leh mipui zarah Congress party a sorkar chuan hman tangkai theih turin kan siamtha leh anga, mi tam tak tan eizawnna a awlsam phah dawn a ni. Compensation tam lutuk avanga MNF sorkar lai, kum 1998-2008 chhunga hnathawktu Company pawhin a chawlhsan tawh Tuirial Hydel Project pawh Congress sorkarin a din tha a. Tuirial Hydel Project in Kawlphetha a siam chhuah zawng zawng pawh Mizoram in a chang vek a, a thlawn a 12 % kawlphetha Tuirial Hydel Project atanga kan dawn tawh zawng zawng hi cheng vbch 30 chuang man a ni hial tawh a ni. Falkawn Referral Hospital tluchhe vek tawh pawh Congress sorkarin a din thar leh a, COVID-19 hripui lakah pawh Mizoram tana kulhpui rinawm ni phakin a thuam tha a, mi tam takin Falkawn Referral Hospital atangin Pathian zarah damna an chang tawh a ni.” a ti.
Dr. Lallianchhunga chuan, “MNF sorkar hnuaia kan ram sum leh pai dinhmun chhe mek pawh hi ram sum leh pai enkawl thiam Pu Lalsawta hoin siamthat kan duh takzet a. Sorkar hnathawkte a hun taka hlawh pek leh sorkar hnathawk ten an GPF an lak chhuah theihna tura ram sum leh pai dinhmun siam that te hi Congress sorkar lo chu ti thiam an awm lovang. MNF sorkar hnuaiah tunah hian nausen piang hlim pawhin Rs. 90,000 chuang an ba mek a ni. Kan ram sum leh pai dinhmun siam that a nih theih nan Congress party kan sawrkar a tul a. Thusawi thiam ringawt hi ram hmasawnna a ni lo tih Mizoram mipuiin kan hre chiang takzet tawh a ni” a ti bawk.
He Unit tlawhchhuahna hunah hian MPCC Secretary Lalchawla, Champhai South Block Congress Committee (CSBCC) President Rosangzuala leh a thawhpuiten Dr. Lallianchhunga hi an tawiawm a ni.
