MPYCC chuan vawiin khan thuchhuah siamin, “Chief Minister zahawm tak leh Finance changtu Minister ni bawk Pu Zoramthanga kaihhruaina hnuaiah sorkar hnathawk ten a hun takah hlawh an la ngai ta reng reng lo mai hi a lungchhiat thlak kan ti takzet a. Sorkar hnathawk ten a hun taka hlawh la lo va, thla chanve a ral dawn tawh-ah te hlawh an lak theih tur thu kan Minister zahawm tak tak te zingah hmai uang taka TV leh Chanchinbu lama puanzar tura an puang duh hial ta te phei hi chu thil zahthlak tawp-ah MPYCC chuan kan ti a ni.
“MNF sorkar hian a hnathawk te hlawh a hun taka a pek theih loh avang hian, sorkar hnathawk tam tak loan chi hrang hrang la ten, a hun takah am loan lak an rul thei lo a, hei hian bank lama an record ti chhia in, loan an puk leh zel na turah pawh nasa takin a nghawng buai mek a. Sorkar hnathawk te berin a hun taka hlawh an lak thin loh avang hian Mizoram mipui te nasa takin min nghawng buai mek bawk a, sum lengvak a tlem in, mirethei leh harsa zawk te thlengin nasa takin min nghawng buai nasa zual mek bawk a ni.
“Hun kaltawh leh Congress sorkar kalta-ah kha chuan sorkar hnathawk te hlawh hi thla tawp ni-ah emaw, thla thar ni khat-ah emaw a lut thin a, MNF sorkar kalmek-ah hi chuan Group B leh C te hlawh hi ni 10 hmain a lut ngai meuh lo a, Group A leh B te phei chuan ni 10 leh 20 inkar-ah hlawh an la ve thei tawk zel a ni.
“Sorkar hnathawk te hian a hun taka hlawh an lak theih mai loh bakah hian, MNF Sorkarna hnuai ah hian an hlawh atanga sum an dah that GP Fund te ngei pawh an mamawh hunah an la chhuak thei ngai lo a. Sorkar hnathawk pension tawh te pawn sorkar a thil tithei tak an nih loh chuan an pawisa lak tur ang an lachhuak thei lo mek bawk a ni,” an ti.
Thuchhuahah chuan, “MNF Sorkar Pu Zoramthanga kaihhruai hian, Covid 19 hrileng chu sum neih loh chhuanlam atana hmang tawh lo tur in MPYCC chuan kan ngen a. MNF sorkar hian a duh na lamah leh an mahni in hlawkna an tel theih na turah chuan sum tam tham tak tak pawh an theh chhuak pawp pawp thei reng a. A michhawr te hlawh pawh a pek hleih theih loh mek lai a, SEDP cheng nuai 3 aia tlem lo nilo cheng nuai thum aia tlem cheng 25000 sem a tum mek pawh hian MNF sorkar Pu Zoramtanga kaihhruai in kan ram an tih chhiat nasa zia leh retheih na khur a min hruai luh thuk tawh zia a ti lang chiang hle-ah MPYCC chuan kan ti a ni,” an ti bawk.
