Congress Thalai MPYCC President Dr. Lalmalsawma’n vawiin hian a piancham (Birthday) pualin Gilead Special School, Brigate, Bawngkawn, Aizawl tlawhin thilpek a hlan. MPYCC President hian Gilead Special School ṭanpuina pawisa sum fai a hlan bakah, kum khat atan zirlai naupang harsa zual pahnih (2) hostel leh school luhna a tumsak bawk.
Gilead Special School Principal Laldinpuii hnena a piancham pual thilpek a hlannaah hian Dr. Lalmalsawma chuan, Congress Party Manifesto ‘Tang Puihna’-ah Vohbikte an lo him a, an dinhmun a lo that zawkna turin Special Social Security ngaihtuahsak an nih tur thu a sawi.
“Vohbikte hi kan ram tan mi tangkai an ni thei tih ka hrechiang a, an tan hian ruahmanna tha zawk kan duang a, dinhmun tha leh him zawk, anmahni chawikan zelna tur ruahman a ni ang. An tan hian felfai takin hmalakna tur kan duang a ni,” MPYCC President chuan a ti.
Dr. Lalmalsawma chuan, Vohbikte enkawl kawngah Spastic Society of Mizoram te hnathawh hi a ropuiin an inpekna a ropui hle a ni. Vohbik kan tih te hi an enkawlna hnuaiah kan ram tan mi chhenfakawm, kohhran leh khawtlang tan a mi tangkai tam tak an chher chhuak thei hi a lawmawm hle a ni, a ti.
Autism Spectrum Disorder (ADS) kan tih mai te hi thil zahthlak a ni lo, mahse abika enkawl ngai an ni a. Khawvela mi ropui tak tak Entrepreneur ropui leh khawvela hausa ber Elon Musk, Scientist ropui Albert Einstein, Henry Cavendish adt. te pawh kha ADS nei an nih thu Dr. Mala chuan a sawi.
Gilead Special School, Brigate, Bawngkawn awmna hmun hi Pu Lal Thanhawla Chief Minister a nih laia Land Lease hmanga pek an ni a. An building chu North Eastern Council (NEC) Fund atanga sak sak a.
Tunah hian Pre School atanga Class VIII thleng kal theihna niin, sorkarin adhoc aided school-ah a daha zirtirtu hi anmahni Society rawih bakah, sorkarin panga leh 4th grade pakhat a pe bawk. Zirlai naupang thahnem tak an enkawl a, Physio therapy, Occupational therapy leh speech therapy na pe nghal a, hostel pawh an nei tawh a ni. Sponsorship an dawn atangin zirlai harsa tak takte pawhin zirna an zawm theih phah bawk a ni.
