Mizo Society of America, Maryland Branch te buatsaih, Mizo Day Vawi 31-na, September ni 2, 2024 (Thawhtanni) khan hman niin hetah hian Mizoram Chief Minister Pu Lalduhoma chu khuallian a ni a. Chief Minister Discreationary Fund atana thawh khawm US $37,460.00 an lo hlan bakah Pu Lalduhoma hnenah hian US President’s Liftetime Achievement Award hlan a ni tih tarlan a ni a. Social Media platform hrang hrang a luah hnehin Chief Minister Official Social Media lamah pawh chhuang takin tarlan nghal a ni bawk.
Congress thalai chuan US President Lifetime Achievement Award dawng tawh te’n a dawn tur thu hriattirna an dawn ang pawh hriattir lawkna awm hauh lova, America khua leh tui nihna nei, US tana midang tanpuia darkar 4000 chuang thawk tawh chauhin an dawn thin, US Civil mi chawimawina sang, Award dawng tur pawha application June thla close a nih daih tawh, US a zuk zin remchan lai taka a zuk dawng nghal thei mai hi chhuanawm a tiin a lawmpui takzet a ni.
Mizoram mipuiin ram ropui America President chawimawina sang a dawng kan lawm em em laiin, Award dawngte hming leh an dawn chhan tarlanna website-ah kumin 2024-a President’s Lifetime Achievement Award 2024 list-a tarlan a ni ve miah lo hi Congress Thalai chuan a mak a ti a. “Award dawng tura thlan te RiseHer Network Illuminating Hope te’n Dinner Gala, Atlanta-ah September 7, 2024-a programme an hmanpui huna sawm a ni ve miah lote hi Mizoram mipui tan a hrilhhai thlak takzet a, Chief Minister zahlohna nasa takah Congress thalai chuan a ngai a ni,” an ti a.
“Hetiang chawimawna sang Mizoram Chief Minister-in a dawng tih hre reng si a, a kaihhruai ZPM sorkarin lawmpuina hun an buatsaih sak miah lo leh a thawhpui Minister, MLA leh ZPM party pawhin an lawmpui thu vawi khatmah an sawi miah lo hian Chief Minister Pu Lalduhoma paihthlak tumna leh ZPM party boruak chhiatzia a tarlangah Congress thalai chuan a ngai a ni.
“Congress thalai chuan Chief Minister chawimawina dawn chungchangah hian engvangin nge a Social Media handle (enkawltute) hian an delete tih te, Award dik lo an lo pe tih te leh Certificate dik tak chu Indian Embassy-ah Deliver a ni tih te hi mipui hriata sawifiah turin sorkar a phut a ni.
“He Award hi mipuiin enchhin tura duhtaka an thlan Chief Minister bawlna leh inbumna nge, dawt hmanga Mizoram mipui laka lan ropui tumna avanga in chawimawi derna tih sawifiah turin ZPM party leh sorkar a ngen a ni.
“Chief Minister USA zinin khawvel ram ropui zinga tel phak India rama a chen reng lai leh chumi chhunga state pakhat hotu ber ni bawkin thlabar taka Arakan Army chakzia, an hlauhawm zia te leh Lawngtlai thlenga min tihbuai theih tur thu thlabar taka a sawi kha Congress Thalai chuan a lainat takzet a. Tun a chinah chuan Pathian ringtu ram, Mizoram mipui leh India sorkar i bulah an awm tih hriain thlamuang taka lo awm tawh turin Congress thalai chuan a chah a ni,” an ti bawk.
