Nimin khan Congress Thalai chuan Mizoram leh Assam ramri duty Aitlang, Sabual Zau ami IR te tlawhin, tui in tur case 30, chhang ei tur leh filter te an camp-ah an zuk hlan. Tualchhung chanchinbu pakhat chuan July ni 4, 2022 chhuakah Aitlang, Sabual Zaua IR duty te tui in tur filter dan a tichhuak a, hemi hi Congress Thalai chuan bawhzuiin, nimin khan MPYCC Vice President Laltawnliana hovin an zuk tlawh a ni.
Congress Thalai Vice President Laltawnliana chuan IR duty te chu MPYCC ten an ngaihsakna lantir an duh thu a sawi a, “Kan ngaihsak che u a ni tih hi kan rawn tilang duh a, thil ropui leh tam tak rawn thlen thei lo mah ila kan ram tana pasaltha ram mute hi kan hre reng che u tih kan rawn lantir a ni,” a ti a.
“Keini hi sorkar sawisel emaw, tu emaw dema rawn kal kan ni lo a, in dinhmun kan lo hriatin ngaihsak in ngai hle mai niin kan hria a, kan phak tawk chin chinah kan rawn ngaihsak che u a. Harsatna in tawk a nih pawhin theihtawp kan rawn chhuah ve zel dawn a, kan awm ve reng a ni. He laiah khaw lum leh hmunhma rem lo takah in duty a, in duty na pawh a hahthlak tih kan hria, mahse sawisel nei miah loa hetianga in duty hi fak in phu kan ti a ni,” MPYCC Vice President Laltawnliana chuan a ti.
IR duty te hian harsatna lian tham tun dinhmunah an nei lo tih an lo sawi a, an tui in tur filter dan chu Chhattisgarh lamah pawh an lo tih thin dan a nih an lo sawi a. An tui filter thlalak pawh chu anmahni vawrhdarh a nih loh thu an lo sawi bawk a, tun dinhmunah chuan boruak a muanawm rih thu an lo sawi.
Aitlang lamah hian camp pathum a awm a, Congress Thalai ten an tlawh Aitlang, Sabual Zau bikah hian IR hi 15 an in duty chhawk thin a, ni 15 dan zelah an inthlak thin a ni. Aitlang, Sabual Zau hi motor-in kal thlen theih a nih tawh rih loh avangin MPYCC te hian IR duty te an thil pek tur hi a hnunah an zuk pu thleng a ni.
