Tunhnai khan Congress Thalai Hqrs (MPYCC) chuan Mizoram Comprehensive Education (MICE) School (Higher Secondary & High School building) sak a that tawk loh thu a dawng a, he thudawn bawhzui hian Congress Thalai hruaitute chuan MICE School Tuikual chu Dt 26.10.2022 khan an tlawh a. He building sak zawh tawh hi engvanga tun thlenga la luah loh nge a nih? tih hi Education Minister an zawt a. Estimate leh Drawing anga sak a ni chiah em? tih hi sawifiah thuai tur leh a hmuna tlawh ve ngei turin Education Minister chu Congress Thalai chuan an phut a ni.
Congress Thalaite chuan an huh dan sawiin, “Verandah tlakdal (iron railing) hi a nghet tha tawk lova, siam zawh vek tawh hnua tihngheh chawp lehna hnu hma pawh tam tak a awm a. Tin, Classroom tur chhawng li-na tukverh sang takah hian tlakdal siam a ni lo chu zirlaite tan a hlauhawm thei dawn niin kan hmu bawk a. Building hnuai ber (ground floor) chu a bang (wall) a awm loh avangin lirnghing palhah a building pumpui tan a hlauhawm thei hle dawn a. Septic tank pawh a building nena in phu lovin a te (small) em em a, tuihawk luanna (drain) mumal taka siam a ni lo bawk. MICE School building sakna tur sum hi Congress sawrkar laia NEDP sum atanga sanction vek tawh a ni chunga hetianga luah that ngam loh khawpa sak a ni hi Congress Thalai chuan pawi kan ti em em a ni.
“Hetiang teh nuaih hi building sak dan a nih avang hian MICE School thuneitute leh zirlaiten ngaihngam taka an luahluh thuai theih nan a tul anga hma la tur leh building sak dan te sawifiah turin Congress Thalai chuan Education Minister chu kan phut a. A enkawlna hnuaia NABARD sum hmanga Mizoram khaw hrang hranga School sak that leh thawm thatah pawisa luangral tam tak awm thu Assembly House hiala sawichhuah anih tawh avangte hian Education Minister chungah Congress Thalaite chuan rinna nghah harsa kan ti hle a. Zirna kaihhnawih hi politics khelh nan leh sum siam nana hmang lo turin Education Minister leh a sangawizawnpuite chu Congress Thalai Hqrs. chuan kan chah nghal bawk a nim” tiin thuchhuah an siam.
