15/7/2022: Vawiin chawhnu dar 3:30 khan July ni 11, 2022-a Stroke avanga bo ral ta, Millenium Centre-a Grape Wine dawr neitu Pi Lalhriatpuii (L), Dawrpui Vengthar chu MPYCC-i a chenna inah an ral a, Congress Thalaite hian chhiatna rapthlak tak thleng avang khan Aizawl khawpui hmun remchangah flag dum leh poster thuziak chi hrang hrang tarin an hnatlang zui nghal bawk.
Pi Lalhriatpuii (L), Dawrpui Vengthar ralnaah hian MPYCC Vice President Pu Laltawnliana chuan MPYCC aiawhin thu a sawi a, “Mizoramah mipuite dikna leh zahawmna rahbeh mek a ni a, hemi hi Congress Thalaiin kan duh lo hle a, hei vanga he thihnaah pawh dikna a thlen theih nana hma la pawh kan ni a. He thil hi politics vanga ti kan ni lo tih hi kan sawi nawn duh bawk a ni,” a ti a.
“Vawiina kan rawn kal avang hian Congress party hi in chhungkuain lo hawi ula kan ti lo, kan rawn tawrhpui che u a ni tih hi kan rawn ral chhan che u chu a ni. He thihna avang hian keini thalaite chuan kan dikna leh chanvo kan laklet leh theih nan theih tawp kan chhuah a ni,” Pu Laltawnliana chuan a ti a.
“He thihna rapthlak tak hi nangmahni chauh chhiat tawhna ni lovin, Mizo mipuitena chhiat kan tawhna a ni,” a ti bawk.
MPYCC ten ralna an thawhkhawm hi MPYCC Treasurer Pu Ngurdingpuia Pachuau chuan Pi Lalhriatpuii (L), fapa hnenah a hlan a ni.
Congress Thalai hian May ni 27, 2022-a Millenium Centre-a Grape Wine thahnem tawk tak man a nih kha hriaiin, Pi Lalhriatpuii ngei pawh hi a hlimchhawnah MPYCC aiawh intirin thil nihna dik tak hre turin an kawm tawh a. Zu pangngai an kutah man a nih loh thute leh sorkarin an man dan phungah MLP Act 2019 leh Rules puangzar chiang turin June ni 7, 2022 khan MPYCC chuan hma lain Press Release an lo siam tawh a ni. Thihna hial a lo thlen tak zel avangin July ni 12, 2022 khan MPYCC chuan Pi Lalhriatpuii (L) chhungte hnenah zangnadawmna cheng nuai 100 pe turin Excise & Narcotics Minister Dr. K. Beichhua hnenah lehkha an thehlut a, he hmalakna hi ngaichangin July ni 13, 2022 khan Secretariat gate bulah nilengin hun an lo hmang tawh bawk a, hmalak chhunzawm zel an tum bawk a ni.
