Vawiin ni 9.8.2024 (Zirtawpni) khan Congress thalai chuan Indian Youth Congress dincham kum 63 pualin Lengpui kawngah Thing phun hnatlang an nei.
Pu Laltawnliana President MPYCC chuan, Indian Youth Congress chu khawvela hruaitu thalai pawl upa ber a nih thu sawiin, Congress thalai chuan kum 1970 chho atang khan a dincham pualin thing phun te an ti chho in, hmalakna hrang hrang chhungkaw hmalam hun ruahmanna te, chhungkaw buaina leh nupui pasal neih avanga thihna te nasa taka dovin an thawk, tih sawiin, Mizoramah pawh nasa takin Congress thalai chuan ram tan hna a thawk a. Mizoram chhunga hmasawnna ruhrel leh kan nitin mamawh tangkai tam zawk hi chutiang hmalakna zara Mizoramin kan neih chu a ni, a ti.
Pu Tawna chuan, tha ber leh dik bera in sawiah thutiam tam tak nena mipuia inzuar ZPM chu mipuiin beiseina sang tak nen an enchhin a. Mahse an thlen chin zelah Mizoram mipui beidawnna nitin a zual a. Mipui manganna nasa zel tur ngaihtuahin Mizoram hmalam hun chu mangan thlak tak a ni, a ti a, MNF leh ZPM chu BJP naute, Mizoram leh India ram mipui tana him lo leh mangchhia an ni. BJP kaihhruai NDA leh ZPM chu a ni telin ram chhung hmuntinah an tlahniam a. ZPM sorkar rintlak tawk lohna hri pawh Mizoramah natna angin a leng a ni, a ti bawk.
Indian Youth Congress hi Ni 9 August 1960 khan din a ni a. Kum 1947-a India ram inthen hnu lawkah kum 1960 chho tawp lam thleng khan Indian National Congress-a department pakhat a ni. Indira Gandhi Prime minister a nih lai khan Youth Congress chu Congress Party hmalam pantirtu leh nasa taka social work lam tiin nasa takin an thawk thin.
Tuna IYC President chu Srinivas BV a ni a. IYC headquarters hi 5, Raisina Hill, New Delhi-ah awmin India ram pumah IYC Member mi nuai 50 an awm mek a. National level-ah office bearer 39 an awm a, state, Loksabha, Assembly leh Booth level-ten an dawt a ni. A vaiin Booth level-ah committee 174,000 din a ni tawh a. International lamah Progressive Alliance nen inzawmna neiin Socialist International hnuaiah in register a ni.
Vawiina Foundation day puala programme hi India ram state hrang hrangah hman niin Mizoramah pawh District hrang hrangah he hun hi hmun 8 ah hman niin thing leh pangpar lam chi kung 167 phun a ni a. MPYCC hruaitu leh hnathawktu engemawzat an tel a ni.
