Congress Thalaite chuan thudik leh rintlak chauh kan sawi thin tur a ni. Thudik post turin fake account neih a ngailo – Dr. Lalmalsawma Nghaka, President, MPYCC

Vawiin chawhnu dar 1:00 pm khan Congress Thalai Hqrs – Mizoram Pradesh Youth Congress Committee (MPYCC) chuan Congress Bhavan MPYCC Room-ah Social Media Training an nei a, party thu leh hla puanzar kawngah fimkhur tak chunga thahnemngai taka hmalak dan turte an sawiho.

S. Lalrinawma, Gen. Secy kaihhruai training-ah hian Congress Thalai President Dr. Lalmalsawma Nghaka chuan member kalkhawmte fuihna thu sawiin, “Congress Party hian Sawrkar ngawr ngawr hi kan tum a ni lova, sawrkar tha siam kan tum a ni. Kan tum dan leh kan manifesto te hi Zoram mipuiten chiang taka an hriat theih nan theihtawp chhuaha social media hmanga puanzar hi Congress thalaite mawhphurhna a. Amaherawhchu, social media-a thu kan post reng rengin tawngkam dik leh hawihhawm tak kan hman thin a pawimawh a ni.” a ti.

MPYCC President chuan, “Tunlai Social Media ah tute party workers thahnemngai thenkhat ten Facebook, Instagram, Twitter, Whatsapp ah te hian fake account nena mi bei vak vak thin an awm a. Hetiang hi mi dawihzep leh mi puh hmingchhiat duhtute thil tih a ni thin a, keini Congress thalaite chuan thudik leh rintlak chauh kan sawi thin tur a ni a, thudik post turin fake account neih a ngai lo. MNF leh Congress sawrkar kha kan buk dawn anih chuan kan in danglam hleih takzet a, keini Congress chu kan thutiamah kan ding thin. Kan ti ang kan ti chu kan ti ngei thin. Kan inrinawm hleih a, a chhelai siamthatu kan ni,” a ti a. Social Media thenkhatah Skywalk leh Ropeway hlamzuih chungchang sawi a awm leh zauh thin. Congress kha la sawrkar ila chu heng Skywalk leh Ropeway te hi a hlawhtling tawh ang. Congress sawrkara Tourism Minister khan a tul angte chhui turin CBI koh luh a ngam a. MNF sawrkar hian engvanga CBI hi ko lut lo nge an nih? tih hi kan zawt a ni. Koh luh a hnekin an lo luh loh dan ringawt an zawng niin kan hria. Congress Thalai MPYCC hian Aviation chungchanga Lok Ayukta-a FIR kan lo thehluh tawh pawh Lok Ayukta chuan CBI chhui turin a ti tawh a, Mizoram sawrkar hian CBI a ko lut ngam dawn em? tih kan zawt nawn leh bawk, Dr Mala chuan a ti.

Thupui sawitu Pu Ngurdingpuia Pachuau, Treasurer chuan, “Tunlai khawvelah social media hmang tangkai thiam apiangte hi mi thawhhlawk leh tangkai an nih tawh avangin kan boruak tawn mil zela kan in her rem leh hmachhawn thiam a pawimawh a. Thudik leh belhchian dawl chauh thehdarh turin mitin fimkhur ila, finfiahna awm ngei ni thei se a tha hle a ni,”a ti.

Zawhna leh chhanna hun bakah hmalak dan turte sawi hovin, Social Media-a party tana hmala thate hnenah Laltawnliana, Vice President chuan lawmman a hlan a, member ten hlawkpui an ti hle a ni.