Vawiin June ni 9, 2023 (Zirtawpni) hian Golden Hall, Congress Bhawan-ah Friday Political Session neih a ni.
He hunah hian MPCC President Lalsawta chuan thusawiin, Congress Party a nihna nei, a te ber atanga a lu ber thlengin taima taka kan hnathawh rah te lawm tak leh hlim takin kan seng mek a ni, a ti.
Lalsawta chuan, kan ram tan theihtawpin Bhawan-ah kan kal khawm thin a. Hmun hrang hranga kan thawhpui mi duhawm tak tak te tan pawh kan Inpui a ni, a ti. He kan Inpuiah hian tumah an inthlahrung tur a ni lo, inhmangaih tak leh induhsak takin i awm zel ang u, a ti.
Lalsawta chuan, sorkar ve hrim hrim tumin keimah hi a mimal takin min rawn sawichhe dawn. Ka hlau lo. Mahse keini chuan kan sawi chhe ve tur a ni lo. Congress Party mi, mi hmaa thusawi pha chin chuan party dang sawi chhe ve lo turin ka duh che u a ni, a ti a. Tuna Congress future hi keimahah a awm. MPCC President Lalsawta hi hlemhletna (Corruption)-ah min bei a nih chuan dawt a ni ang, an finfiah theilo a nih chuan a man hi a to khawp ang. Ka tum chu ram leh hnam tan a ni. Sorkar duh vanga rilru fim put theih loh hi ram tan bawk a hlauhawm a ni, a ti.
Lalsawta chuan,kan ram, kan hnam leh kan sakhaw tan kan rinawm a ngai, kan ram tan rinawm kan mamawh, rinawmna tel lo chuan engkim hi a ho vek. India Constitution siamtute pawhin an dah pawimawh ber chu rinawmna hi a ni. Chuvangin mipui thlanchhuah te pawh rinawmna thutiam an lak tur an duang a. Hlauhna leh duhsak bik nei lovin hmangaihna nen huatna tel lovin mi tupawh ka enkawl ang, tiin an thutiam lak tur an duang a ni, a ti.
Pathianin Congress Party kawng a hruai a, mi tha tak tak leh rinawm min pe zel. June thla chhungin Politics khelh fuh tum lo, tih dik leh siam that tum te inlawmluhna runpui kan nei dawn. Chumi zawhah Mizoram siamthar lehna bial fan runpui bul tanna neiin kan feh chhuak ang a. Hei hi Mizoram chanchin a hriat reng tawh tur a ni ang, a ti bawk.
Friaday Political Session hi Vanlalruata (Maruata) Gen. Secy MPCC in a kaihruai a. John Siamkunga Gen. Secy (GAD), V. Lalthazuala Gen. Secy leh Ramani Chakma, President CADCC te’n thu a sawi a. Lianhleia Secretary, Media Department leh NSUI President RB Lalmalsawma te’n report a pek bakah zaihona hun hman a ni bawk.
