August ni 30, 2022 Thawhlehnia Mizoram sorkar Council of Ministers thukhawmin an thu passed hrang hrangte chu Mizo National Front chuan lawmawm a ti a. Chief Minister Pu Zoramthanga kaihhruai sorkar hi mipui hmakhawngai tak a nih zia a lang zel a, Mizoram tana tha tur an ngaihtuah kawngah hian Council of Ministers te chhuanawm kan ti hle a ni, an ti.
Vawiina MNF-in thuchhuah an siamah chuan, “Term hmasa lama Kohhran leh Tlawmngai Pawl bakah Zoram mipuite duh loh em em zu zawrh khap a ni chhun zawm zel tur leh he dan hi khawng taka kalpui a ni zel tur hi lawmawm kan ti hle a. The Mizoram Liquor (Prohibition) Draft Rules, 2022 ngaihtuah that a ni a, Mizoram chhunga kuthnathawktute grep thar atanga Dan hnuaia wine siam leh hralh phal a ni tur hi lawmawm kan ti. A bikin Champhai leh Hnahlan lama Grape chingtuten Dan hnuaiah ngei ngaihngam taka an thawhrim rah an seng tur hi thinlung takin kan lawmpui a, Mizoram economy siamthatu an nih ngei kan beisei a ni.
“Tin, hun rei tak hlawh pung miah loa thawk tawh Samagra Shiksha hnuaia zirtirtu mi 5000 dawn te dinhmum siam that sak nan DA 15% leh Medical Allowance bakah an thawh rei dan azirin allowance pek sorkarin a remti hi MNF party chuan Samagra Shiksha hnuaia thawkte kan lawmpui hle.
“Mizoram Sports Incentive Cash Award Scheme 2022 chungchang ngaihtuah a ni a,inkaihhruaina hrang hrangte zirhoa pawm a ni hi lawmawm kan ti a. Kum 2001 khan Incentive Cash Award Rules hi MNF sorkar chuan a lo duang tawh a, kum 2008 khan Amend a ni leh a. Kum 10 chuang zet rin a nih hnuah nimina Council of Ministers thu khawmin Mizoram Sports Incentive Cash Award Scheme 2022 thar an pawm hi infiammi te kan lawmpui tak zet zet a ni. Mizorama Infiammi te hmakhawngaia hmalakna lian tham ho -Sports Incentive Cash Award Rules 2001, Mizoram State Sports Council Act 2002, Mizoram State Sports Council Rules 2005, Mizoram Sports Policy 2019, Mizoram infiammi te tan 5% Job reservation 2019, Sports hi Industry a puan 2020, Mizoram Sports Incentive Cash Award Scheme 2022 te hi MNF sorkar lai zela duan a ni thin hi MNF in infiammi thalaite a hmangaihzia lantirnaah kan ngai bawk.
“Mizoram sports incentive cash Award scheme 2022 pawm tak hi Mizo infiammi ram tana hlawhtlingte tan Sum fai ṭhahnem tak pekna tur a ni a. Olympic a Gold Medal latuin Cheng nuai 100, Silver medal lain Cheng nuai 75, Bronze medal latu in Cheng nuai 50 an dawng tawh dâwn a. Tin, Commonwealth Games/ Asian Games/Youth Olympic Games a Gold Medal latu in Cheng nuai 25, Silver medal latuin Cheng nuai 15 leh Bronze medal latuin cheng nuai 7.5 an dawng tawh dawn a ni. Heng bakah hian International leh National levela Mizoram tana lawmman latu ten sum fai ṭhahnem tak an dawn theihna tur a tel bawk a. Mizorama infiammi ṭhalaite tana Mel lung pawimawh tak phum a ni zel leh infiammi te hmakhawngaia hmalakna lian tham MNF sorkarin a din mek avang hian Chief Minister Pu Zoramthanga leh Sports Minister Pu Robert Romawia Royte te chungah lawmthu kan sawi a, Mizoram infiammi ṭhalaite ram tana hlawhtlinna chang zel turin duhsakna kan hlan a ni.
“Myanmar leh Bangladesh lama insumdawn tawnna te – Zokhawthar, Kawrpuichhuah leh Zorinpui Immigration Check Post-ah Mizoram Police tan post 20 siam belh remtih a ni.Home Department hnuaiah vek hian Head Constable (Operator) post 34 chu MPRO, Mizoram Police hnuaia Assistant Sub Inspector (Operator) a hlankai vawiin Cabinet meeting chuan a remti a ni.
“Planning & Programme Implementation Department Mizoram Startup Mission (Government Society) din tura rawtna a thlen chu ngaihtuah ho a ni bawk a. Thalai tam tak tan eizawnna ruahman sakna tur tha tak a nih theih dan tur sawihovin, he rawtna hi pawm a ni.
“Department hrang hranga Contract Employee te hnena 10% Dearness Allowance pek remtih a ni hi thawktute kan lawmpui tak zet a ni.
“Tin, Sorkar laipuiin District Rural Development Agencies (DRDA) ti tawp tura thu a chhuah hnu in district tina DRDA te chu District Rural Development Office (DRDO) ah leh a, Project Director (PD) 11 te chu MCS JAG level post a lakluh (encadre) tura rawtna te pawm a ni hian thingtlang lama thawktute Mizoram sorkarin a ngaih pawimawhzia a lang chiang kan tiin lawmawm kan ti,” tiin an tarlang a ni.
