Aizawl 23rd March, 2022: Tukin khan AMC Ward-III Councillor Pi C.Lalchhandami chuan Property Tax Return 2021-2022 hmanga MUP Building Ramhlun Sports Complex Venga sak a hawng.
Ramhlun Sports Complex Veng-a MUP Building hi Bialtu MLA Dr. Vanlalthlana’n a sakna bul a lo tan sak tawh a, AMC Ward-III Councillor Pi C.Lalchhandami Property Tax Return 2021 -2022 hmangin MUP Building hi sak zawh a ni ta a ni. MUP Building tha taka sak zawh a ni ta hi MUP Ramhlun Sports Complex leh khawtlang mipuite an lawm hle a ni.
Ward-III Councillor Pi Damtei chuan, “Naupang leh kum upate hamthatna ngaihsakna hmun apiangah ram a changkang a. Kum upate hi kan library an ni a. Upa pakhat an boralin library pakhat zel hloh ang kan nih avangin kum upate hi an hlu em em a ni,” a ti a. Hetianga MUP ten an mamawh leh inkawm hlim ve na tur Property Tax Return hmanga an sa zo thei chu a lawmpui thu leh a tangkai thei ang ber a hmang turin duhsakna a hlan a ni.
Property Tax Return 2021-2022 hmang thoin Ramhlun North Local Council House pawh chei that mek a ni a. Rei lo teah hawn theih thuai beisei a ni.
AMC Ward Fund leh Property Tax return 2021-2022 te hi a tha thei leh tangkai leh dik thei ang ber a hman a ni a. Pi Damteii chuan theih tawpa Ward tana hmalak mek a nih lai leh thahnemngai taka thawh a nih laia inti hmingchhe zawnga thil kalpui a ni thin chu pawi a tiin, party aia khawtlang hmasawnna ngaipawimawh zawk turin leh, khawtlang tana theihtawp chhuah puiah AMC Ward-III huamchhunga Local Council hruaitute chu a ngen a ni.
Pi Damteii hi Ward-III committee member-te, ZPM Thalai Hqrs. hruaitute leh, Block leh Unit hruaitute’n an tawiawm a ni.
