Mizorama nitina Covid-19 kai hmuhchhuah zat chu a tlem thlak tial tial hnu ah tunhnaiah a pung chho leh tan a, Thawhlehni khan hun engemawchen a thlen ngai tawh loh a za bi a thleng chho. July 4-a sample endik, July 5 zinga result tihchhuahah Covid kai 138 an awm a. Tunhnai thla hnih chhung vela Mizorama ni khata Covid kai hmuh tam ber chu June 29 kha niin, 64 hmuh an ni a; tun tuma hmuh 138 hian a khum chiang hle.
Hri kai enkawl lai 338 an awm a ni. Covid-19 kaihhnawiha state nodal officer leh thupuangtu Dr Pachuau Lalmalsawma chuan Mizoramah Covid-19 hri kai kan pun leh mek avanga fimkhurna kawnga tan la thar tur leh infuihthar turin mipui a ngen. Covid-19 leng mekin ziaawm a pan tawha hriat a nih laiin, tunhnaiah khawvel pumah hri kai thar an pung leh tih sawiin, “Mizoram pawh kan bang bik loa, hun kal tawha he hri hmachhawn a hautak zia kan zavaia kan hriat tlan tawh a nih avangin sawrkar hotute pawhin mipui himdamna tur leh nunna hlu tak kan chan zel loh nan mipui hnenah ngenna tharthawh leh tul a ti a ni,’ a ti.
Khawvel, India leh hmarchhak state dinhmun thlirin Covid-19 kai lai nei tawh mang loten an nei thar leh hlawm tih state nodal officer hian a sawi a. Hmarchhak state hrang hranga hri kai mek awmzat belhkhawm atanga chhutin zaa 30.53 hi Mizorama kai awm mek zat a ni tih a sawi. Tun dinhmuna hri kai 338 awm mek zingah nunna chan awm lo mah se, heng zinga thenkhat hi in lama na tak tak leh damdawi ina awm mek an ni, tiin, “Symptom lan chhuah hnu pawha an nat viau hma chu in test lo, an in test hnua lo tlai tawh si tunhnaia nunna chan zingah pawh an awm a, thalai kum naupang tak natna dang engmah neilo pawhin a thihpui,” a ti a. Natna lan chhuah tan tirh emaw inrinhlelh veleh emawa in test ngei ngei turin mipui a ngen. Heng bakah hian invenna man tlawm, hri kai hnua senso hautak viau bawk si Covid-19 laka him theihna’n khawvelin a invenna tha ber nia ala hriat, Covid Appropriate Behaviour (CAB) uar thar leh turin mipui a chah bawk.
Write to Te-a MD Khawlhring
