Dt.16.4.2022 Inrinni khan Lunglei ‘E’ Bialtu MLA, HPC Vice Chairman ni bawk Pu Lawmawma Tochhawng chuan a bialchhung fan kal zelah Zobawk ‘S’ a Higher Secondary School, Zobawk chu a hmunah kalin a tlawh a, tlailamah Party hruaitute nen inkawmhona hun hmangin zirlai titha chawimawina hun a hmang bawk.
Zirlai titha chawimawina hunah thu sawiin Pu Lawmawma Tochhawng chuan, Aizawlah Officer tam tak an awm a, Lunglei lam mi Aizawla Officer a awm kan tam lo hle a, Lunglei lam mi Aizawla Officer a awm thei khawpa lehkhathiam kan mamawh a, chuvangin lekhathiam bik te tanpui kan inpeih reng a, HPC atang pawhin hetiang mi bikte tanpuina tur fund hi kan nei reng a ni, tiin zirlai thiamthei bik te inthlahrung lo tur leh tan la sauh sauh turin a fuih a ni.
Pu Lawmawma chuan, Kum 2018 kumtawpah sawrkarna kan chang a, 2019 ah sawrkar han in remfel nek nek leh MP thlan tih vel avangin hna thawhna hun a tlem hle a, 2020 March thla atangin hripui Covid in nasa takin min nuai a, tumah Covid avanga an boral kan phal lova, chhuanchham, eitur nei lovin tumah an awm tur a ni lo kan ti a, tumah chhuanchham an awm lova, Buhfai, Gas leh adt. kan nghei lo, heng zawng zawng hi kan C.M Pu Zoramthanga thahnem ngaihna vang a ni a ti a.
Covid avang hian Development a kal thei lova, heti chung hian kan opponent ten Covid hri leng lo ang maiin puhmawhna awm thei zawng zawngah min puhchhia a, min puhchhiatna tur an la zawng mek zel bawk.Heti chung hian Pathian zarah damkawr takin kan tho chhuak leh mek a, damkawr sawi lovin hmalam panin kan kal zel dawn a, hetiang hun harsa a amite khaichhuak turin Pathianin MNF te a ruat a ni a ti.
SEDP chungchang sawiin, kan sem ang kan ti a, Covid avangin hun engemawti chhung kan kalpui thei lova, tunah kan sem dawn a, opposition lamin kan sem theih an ring lova, tunah kan sem dawn ta si a, an intiamna angin an sem thei lo min ti leh a, mahse a thawhkhatna hi kan sem phawt ang a, a hlawhtlinpui tur te hnenah chuan nuaithum mai ni lovin a tul ang zelin kan kalpui zawk dawn a ni a ti bawk.
LMC chungchangah pawh Pu lawmawma chuan hma kan sawnna tur atana ke kan penna tur a ni a, MNF in kan tih ngei ngei tur te zinga kan dah a ni. LMC hi awm mahse HPC hi a kal ngaiin a kal reng dawn a, LMC fund kan nei ang a, HPC fund kan nei tho dawn bawk a, hengte hi District dangte aia Lunglei kan vanneihna a ni a ti bawk.
Zirlai an chawimawi hi HC.Lalmalsawmi D/o Ngurchungnunga (L) niin, IGFAI University atangin MA(Edu) ah Gold medalist a ni.
Lunglei ‘E’ bialtu MLA, Pu lawmawma Tochhawng hian Zobawk ‘S’ a damlo te kan in mitthi a ral nghal bawk a ni. MNF Sub Hqrs. atangin mi engemawzatin an tawiawm bawk.
