Covid dona atan hian state budget atanga chhutin zaah Rs. 1 pawh sawrkar hian a seng lo : Dr. Vanlalthlana, MLA

ZPM chhung inkhawm vawiina neihah Dr. Vanlalthlana, MLA chuan thu sawiin, “Mipuite hian beisei ram kan nei a, kan kutah hian thiltihtheihna a awm a, thiltihtheihna kan nei a, kan ropui a, mahse kan dawih si, kan dikna chanvo pawh kan humhalh ngam lova, tunah hian kan tui-ek zo ta a ni,” a ti.
ZPM Legislature Party Secretary chuan, “Covid 19 avangin sum kan harsa tih sawi thin a ni a. Covid-19 do na atan 2020-202, a tantirh kumah khan budget atang khan 0.30% (cheng zaah naia sawmthum) an seng a. Kum 2021-2022 covid hluar em em lai khan 0.64% (cheng zaah naia sawmruk pali) budget atangin an seng a ni. Covid dona atan hian state budget atanga chhutin zaah Rs. 1 (cheng khat) pawh sawrkar hian a seng lo. Chuvangin, covid-ah kan inseng hnem an tih hi chu a lo ni lo tawp a ni tih hi mipui ten kan hriat a ngai. A dang zawng chu hmun dang atangin a hmu a, kha kha covid dona atan a lo hmang mai a ni. Enga tinge kan buai tak si, Airport siamna atan sum sen a ngai a lawm. Airport siamna atana tuna sum sen zata khu sawrkar department 30 dawnin budget atana an neih phak loh a ni. Sum siamna atana budget kan hman avang zawk hian kan harsa a ni tih hi mipui ten kan hriat a ngai. Chhungkaw pa berin a pawimawh lai sawrkar hnathawk hlawh leh inenkawlna tur chi hrang hrang dah lovin, tutute emaw intihlenna tur, hnam run mai ni lo, hnam run zuankan thei te hi an awm a. Chungho atan chuan restricted tender te, work order awm hma daiha hna inthawhtir thin a nih avang hian sumah hian kan harsa ta a ni,”a ti bawk.
Sum harsatna sawiin, “Tuna kan CSS sum hetia a chhuak huk tur leh kan sum dinhmun a nghawng dan tur hi session liamtaah pawh khan ZPM Legislature Party MLA ten kan zawt tawh a, a chhanna erawh kan dawng lo. Nikum kumtir atang khan CSS sum hi sawrkar hnenah a thleng a, sawrkarin pechhuak leh tur a nih laiin thil dangah a pawtpeng a, a lo pawhpenna an dahthatna, K-depositah an dah a, a hminga awm siin a pawisa erawh khawi khawiah emaw an pawt peng a. A dang a lo thlen hunah kan rul leh mai ang tih a ni a, amaherawhchu, rulh hleihtheih loh te kha a lo awm chho a, sawrkar hi harh sela tang rawh se, tiin kan lo au tawh thin a, muhil der kaihthawh tum hi thil har tawp a lo ni a, kan inkaiharh zo lo a, amaherawhchu, loh theih lohin central lamin an rawn kuk tho ta a ni,” a ti.
Dr. Vanlalthlana chuan, “Tuna min hruaitu kan sawrkar neih mek hi an sawrkar hmasaka India ram pumpui a thawhchhuah atanga teh a leiba ngah ber a ni. An sawrkar vawi hnihna 2003 atang 2008 chho-ah phei kha chuan tuna Sri Lanka tlukchhiatna chhan an tih, leiba ngah lutuk, thawhchhuah aia tam leiba nei hian min hruai tluan chhuak parh a ni. Tun budget session budget speech-ah khan kum li chhunga leiba neih belh tura an inbeisei zat chu cheng vbc 4500 a ni. Congress sawrkar lai khan kum 10 chhungin cheng vbc 4700 in leiba a pung a, MNF sawrkarah hian kum li chhungin cheng vbc 4500 in a pung dawn. Hei hi kan sum enkawltute min kalpui dan a ni. Mipuite kan ngaih a tha lo a, chuvang chuan kan auchhuah a ngai a ni,” a ti bawk.