Covid-19 hluar laia Quarantine Centre leh Covid Care Centre-a ei leh in man leh volunteer-a thawktute lawmman la pek loh, a vaiin cheng nuai 90 chuang chu pe thuai turin Mizoram sawrkar an phut tih ZPM Thalai chuan an sawi.
ZPM Thalai Hqrs. hruaituten thuthar thehdarhtute an hrilh danin, RTI hmanga zawhna chhannaah Covid-19 hluar vanglaia Quarantine Centre leh CCC hrang hranga ei leh in man tun thlenga Mizoram sawrkarin ala pek loh chu Rs 66,37,385 a ni a; heng hmuna thawk tura inpe thawktute lawmman pek tura intiam Rs. 29,93,000 pek ala ni lo.
“Mizoram sawrkar hian state budget atangin lockdown lai khan lockdown avanga tam tuarte tan tanpuina engmah a pe loa, hetih lai hian CM Relief Fund for Covid-19 ah kohhran, pawl leh mimal-ten thawhlawm an chhunglut ruih ruih thung a. Chuvangin hetiang zat zat leiba hi sawrkar hian a nei turah kan ngai loa, CM Relief Fund for Covid-19 a tanpuina lutte kha khawiah nge a awm, tih hi kan zawhna a ni,” ZPM Thalai senior vice president Dr C Lalrammawia chuan a ti.
MNF sawrkar chuan an sawrkar tirh atanga Covid hrilen lai March 2021 inkar chhung khan mau chînna atan Rs. 272,60,431 an sen tawh bakah hrilen lai tho hian Airport cheithatna atan cheng nuai 7051 man hna Kamrul-a hnena an pe tawh thu te sawiin, “Hei hian an ngaihsak zawng leh an duhnaah chuan MNF sawrkar hian sum an ui lo hle tih a tarlang a ni,” a ti.
Covid-19 pawhin hun rei tak chhung ziaawm lam a pan tawh hnuah leh Covid-19 hluar lai pawha CM Relief Fund for Covid-19-ah sum tam tak a luh ruih ruih lai a, heti zozai sawrkarin leiba a la nei chu pawi an tih thu leh a dawng turte hnenah pe thuai tura sawrkar an ngen thu Dr C Lalrammawia hian a sawi a ni.
