Vawiin July ni 13, 2023 (Ningani) hian Lunglei District Congress Committee (LDCC) buatsaihin Congress Bhavan, Lungleiah Lunglei Town Congress Workers’ Meet hman niin, he hun hi Aizawl aṭangin Pu Lalnunmawia Chuaungo IAS (Rtd), Pu Vanneihthanga Vanchhawng, Pi Meriam L. Hrangchal leh MPCC hruaitu mi engemaw zatin hmanpuiin thusawina an nei
He huna thusawitu Pu Lalnunmawia Chuaungo IAS (Rtd) chuan mi tam takin engvangin nge Congress Party-ah in luh ve ngawt? tiin min zawt ṭhin. Congress Party a ka luhna chhan hi kan ram leh hnam damna tur nia ka hriat Reform Agenda kan tih mai hi kan duang a. Party ṭhenkhatah chuan he Reform Agenda hi zawrh chi niah kan ngai lova. Party ṭhenkhatte erawh kan pe a, an ngaihsak zui duh lo thung a. Congress Party hotute erawh kan pek khan a zir chianna kan neih mai bakah, a hruaituten a hranpa a zir chianna an neih bawk avangin Pu Lalsawta kaihhruai Congress Party hi luhna tlak berah ngaiin kan rawn lut ta a ni, a ti.
Pu Lalnunmawia Chuaungo chuan, miretheite leh khawsak harsa zawkte hamṭhatna tur scheme kan siam te a nihna ang taka a dawng turten an dawn theihna turin hma kan la dawn a ni. Sorkar ṭha nei tur chuan Chief Minister ṭha kan neih angai a. Party lian hruaitu pathum hi mipuiten kan zir chian angai. Dawt hmanga mipui hnena in zuar ṭhin an ni em? Sum leh paiah an rinawm em? Ṭawngkam thiam avang ringawta mipui bum tum ṭhin an ni em, tih kan zir chian angai. Singapore pawhin hruaitu ṭha an neih avangin kum reilo teah khawvela ram changkang ber pawl an lo ni thei. Mizo ṭhalaite pawhin chu chu chhawrin inhlawhin mi tam tak an awm mek. Dan an pal zut loh avang leh dan dik taka an kal avanga hetiang dinhmuna ding thei an ni a. Chutianga hruaitu ṭha, dan zah mi, sum leh paia rinawm chu Mizoram pawhin kan nei a, chu chu Pu Lalsawta a ni, a ti.
Pu Vanneihthanga Vanchhawng pawhin thusawiin, RTI hmangin kan ram leh hnam siamṭhat nan zawhna te kan zawt ṭhin a. Airport Cute siam a nih dawn khan Kamlova Chhangte chu Kamrula a ni tih ka hai chhuak ta a. Airport a thing an kih leh an hnathawh ṭan tirh kha a in mil thei lova, ka chhui zel a. Work Order awm hmasa lovin thla 6 chhung hna an thawk hman a ni. Chutiang chuan Mizoram siam ṭhatna atan mahni phak tawkah ṭhahnem ngai takin kan thawk ve ṭhin a ni, a ti.
Pu Vanneihthanga Vanchhawng chuan, Tuirial Hydel Project siam a nih dawn khan Pu Hawla ten theihtawp an chhuah a, Japan Sorkar ṭanpuina in Foreign Aid a siam tur a ni. Compensation la tur kha chhungkaw 48 vel chauh an ni. Vanduaithlak takin Congress Sorkar chu 1998 ah a tla leh ta si a. MNF sorkar khan Hydel Project neih tumna tak tak aiin Compensation an buaipui a, a tawpah compensation latu chu chhungkaw 1026 an tling chho ta a. Hydel Project pawh kan nei thei ta lo a ni. 2008-ah Congress alo sorkar khan Pu Hawla ten an tipuitling thei ta chauh a ni. 1996 aṭangin Falkawn damdawi in Congress in a buaipui ṭan. 1998 ah Central-in a phal sak a. Congress kha hemi kum hian a tla. MNF an sorkara theihtawp an chhuah chungin pawisa an hman zawh meuh chuan an damdawi in chu thlahrang awm duhna tur chi niin hnim leh pat-ek in a bawm a. Congress sorkar khan nasa taka hma lain medical college a dinin, MIMER hming a vuah a. MNF sorkar chuan MIMER hming chu ZMC tiin an thlak a, chu zawng chu MNF ten an tih ve chhun a ni, a ropui lo khawp mai, a ti.
Pi Meriam L. Hrangchal pawhin thusawiin, kan ram leh hnam chhanna tur atan theihtawp chhuah a thawk turin congress party member te a fuih a. North East State ṭhenkhatah BJP chuan an sum leh pai hmangin an thawhpuite nen sorkarna an siam mek. Sum tam tak sengin inlei tlin hi an tum a ni. Mizoram pawh kan dinhmun a him tawh lo. Manipur-ah BJP sorkar hnuaiah Biak In 300 chuang hal a ni tawh. BJP do tura theihtawp kan chhuah a ṭul a ni, a ti bawk.
