Tuichang bial fanga zin mek Pu Lalduhoma, ZPM Leader chuan vawiin july ni 29, 2022 khan Khawzawl Zuchhip veng leh Khualen-ah te vantlang inkhawm buatsaihin thusawina hun a hmang.
Pu Lalduhoma chuan thusawiin, “Chief minister in kan ram a enkawl danah hian lungawi a har kan ti a. A kutah budget kan dah ngam tawh lo a ni” a ti a. “Kan finance commissioner-in kan ram sum dinhmun that loh zia chiang takin a sawi a. Hetianga sawrkar official te hial an tawng chhuak hian kan sum dinhmun ṭhat loh zia a tarlang chiang hle a ni,” a ti bawk.
Pu Duha chuan, Centrally Sponsored Scheme (CSS) Central-in a dawngtu tur hnena pe chhuak tura a tih chungchang sawiin, “Central sawrkarin Centrally Sponsored Scheme (CSS) sum a nihna tura hman a nih theih nan hun tiam neiin a dawngtu tur department hennah pe chhuak tur state sawrkar a tih angin, Mizoram sawrkar chuan veibelchhe tam tak CSS fund atanga a hmuh chu a pechhuak niin kan lo hria a, a lawmawm pawh kan ti hle a. Chutiang a nih mek lai chuan Central hmuha pe chhuak tawh anga lang siin Mizoram sawrkar chuan a pek chhuah tawh nia hriat te hnen atang hian engemawzat chhuh let leh tumna a awm mek nia hriat a ni a, hetiang hi a lo awm tak tak a nih chuan uluk takin kan enzui dawn a. Hetianga chhuh let leh a, department hnen thleng lo te a awm tak tak a nih chuan department (implementing agency) te hian sum hman tur a kimchangin an nei dawn lo tihna a ni a. Chu chuan development anih tur angin a nihtir theih dawn loh bakah, hetianga pe chhuak tawh anga lang a nih si chuan utilisation certificate an thehluh leh te pawh a la ngai dawn a. Thehluh tur an nei dawn lo emaw utilisation certificate lem an thehluh emaw a ngaih phah dawn tihna a ni bawk ang a. Central-in pechhuak vek tura a tih lai a, central hmuha pechhuak tawh anga inlantir a, department hnen atanga sum hnuh let leh hi a awm tak tak a nih chuan thil fel lo tak a nih dawn avangin ngun takin he thil hi kan enzui ang a, kan ngawihpui mai mai dawn lo a ni,” a ti.
Pu Lalduhoma chuan tukin zing vêk khan Khawzawl District Hospital a hmunah kalin a tlawh a, Doctor leh staff thenkhatte nen inkawmhona hun hmangin harsatna an tawh mekte sawiho a ni. Pu Duha chuan, “Kan sawrkar chuan Health leh education hi kan ngai pawimawh hle dawn a, heng department pahnih hi hmasawnna ruhrel pawimawh tak tak te an ni a. Sawrkar kan hrawn mek hian Budget-ah heng department tan hian hmasawnna tling khawp sum a dah ngai lo a ni,” a ti a. “Tunah hian kan ram hian Doctor bakah, kan ram neih dan enfiahtu tur Surveyor kan mamawh em em a, hengte hi kan sawrkar huna kan ngaih pawimawh hmasak tur te an ni,” a ti bawk.
