MPCC chuan thuchhuah siamin, “Ni 21. 6. 2023 (Nilaini) khan Chief Minister Pu Zoramthanga chu Ebenezer Medical Center, Chawnpuiah MRI (Magnetic Resonance Imaging) tiin a inentir nia sawiin, mipui zinga a thu chu MNF party in ‘VIP Culture nuaibona’ tiin Social Media hrang hrangah nasa takin an ti darh a. Hei hi dam lohna hmanga mipui rilru lak tumna (publicity stunt) mai niin Congress Party chuan a ngai a ni.
“Chief Minister Pu Zoramthanga hian Sorkar damdawiin changtlung tak Refferal Hospital, Falkawn man tlawm zawka pan tur a awm reng laia Private damdawiin a pan ta mai hi School zirtirtuin ama thawhna School ring zo lova Private school-ah a fate kal tir a thlang zawk nen thil inang reng a ni a. Hetianga sorkar damdawiin pan mai lova Private damdawiin a pan hian dah tet a tum em em Health Department changtu Dr. R. Lalthangliana leh sorkar damdawiina thawktute chunga rinna a nghah loh zia chiang takin a lantir a ni.
“Chief Minister hian hetianga Hospital-a thawktute leh mipui inentir ve dang te tih buai hlau leh mi pangngai tak anga lan tum siin a kal kawngah erawh nasa takin Traffic a ti Jam a, amah aia harsa leh rethei zawkte nunphung nasa takin a ti khaihlak thung si hian he thil hi VIP Culture nuaibo tumna lam aiin intihlâr tumna (Publicity Stunt) mai mai leh Politics thila lemchanna dik tak a ni tih a ti chiang hle a ni.
“Chief Minister hi a himna atana thawk tur vengtu bakah a hriselna chungchanga duty tur Doctor leh Ambulance pawh fel taka ruahman a nih laia amah enkawltute ti mualpho zawngin chet a la a. Hetiang a nih chuan Mizoram hmun tam tak Hospital-a hmanrua leh doctor-te indaih loh laia amah viltu Ambulance leh Medical Team a hranpaa neih a ngai lo tih chiang takin a lantir bawk a ni,” an ti bawk.
