Mizoram Chemist & Druggists Association (MCDA) chuan damdawi quality tha leh rintlak kan lei theih nan a nazawnga fak mawi emaw a tlawm nazawng leh hriatchian loh bakah damdawi dawr pangngai a mi ni lo chu lei a him lo tih hria a, damdawi lei leh ei kawnga fimkhur lehzual turin mipui an ngen.
Vawiin a Aizawl Press Club a thuthar thehdarhtute an kawmna ah MCDA president R. Thanglura chuan, damdawi zuar thenkhat in an drug license neih te hmang sualin thil dik lo leh mihring tana hlauhawm leh nunna hial chan theihna tur a ni tih hre reng chunga sum leh pai hlawkna tura ruihhlo zawrh nana lo hmang thin an awm chu pawi an tih thu leh an dem takzet thu a sawi.
Damdawi zawrh phalna license neilo in an duh duha an lo zawrh ve theih a nih loh thu te, hmun thenkhatah leh office vel ah te mi thenkhat in bag leh polythene a khaikhualin damdawi an zuar fo thin tih hriat a nih thu te sawi bawkin, “MRP aia tlawm daih a an hralh theih thin avangin mi tam tak chuan an lei nasat phah a, heng ang kan lo lei hian thil pawi pawh thleng mahse chhui chhuah a harsa thin a, sawrkar tan pawh hmalak dawn in hriat chhuah a harsa thin,” tiin, damdawi reng reng damdawi zuar te dawr atanga lei ngei a him ber thu a sawi.
MCDA hruaitute thil sawi thenkhat:
1. Dan phal loh, mi drug lisence hawh hmangin damdawi zuar an awm thin a, hei hian damdawi tha lo leh a nihna tur ang quality ni pha lo damdawi chah luh leh zawrh pawisak lohna a ti hluar.
2. Midang hnena mahni drug license hawh tir thin te leh hetianga lo hawhsak tute hian damdawi tha lo leh quality thehdarh kawngah mawh an phur nasat avangin, sawrkarin nasa leh zualin heng mite hi chhui chhuak a, a tul anga action lak an duh.
3. Online marketing a damdawi lam kher chah ah thil pawi tam tak a awm thei. Ruihtheih thil thehdarhna chance a awm theih bakah damdawi tha tawk lo hralh chhuahna pawh kawng tam takin a awm thei.
