India rama sawrkar damdawi in ṭha bik tehna-ah Primary Health Centre pahnih – Khawlailung PHC leh Bairabi PHC bakah Urban Primary Health Centre pahnih – Lawipu UPHC leh Sihphir UPHC te an tel thar.
Dr. Lily Chhakchhuak, Mission Director, National Health Mission, Health & Family Welfare Department aṭanga thu kan dawn danin, chuan damdawi in ṭha bik tehna, National Quality Assurance Standards (NQAS)-ah Khawlailung PHC, Bairabi PHC, Lawipu UPHC, leh Sihphir UPHC chu an tling thar a, a tehnaah (a indawtin) 93.84%, 84.89%, 93.63%, leh 93.93% an hmu tih a sawi.
Mizoram puma PHC awm zingah NQAS National Certificate hmu hi 28 awmin, Urban PHC zingah 5 an awm ta a ni.
Heti hian Mizoram chhunga Sawrkar damdawi in 41 te chu NQAS National Certificate nei tawh an ni a. Tunah hian sawrkar damdawi in 18-in state level certificate neiin national certificate result nghak mek 3 an awm bawk a ni.
Health Minister, Pi Lalrinpuii chuan, India rama damdawi in ṭha bik thlan chhuah zingah Mizorama damdawi in an awm belh zel chu lawmawm a tiin damdawiin, district leh state-a thawktu zawng zawng te thawhrimna leh taimakna chhuanawm a tih thu a sawi a. Certified Hospital-a in enkawl theih hrang hrang te mipui ten zirchiang a, tangkai takin hmang se a duh thu a sawi.
National Quality Assurance Standards (NQAS) Certified damdawiin te hi endikna chhawng thum paltlang an ni a, a tawp bera endikna an hmachhawn hi National External Assessment a ni. Heatah hian 70% an hmuh chuan certified an ni chauh thin. Heng Certified tawh damdawiinah te hian natna darh thei ven kawngah te, thawktu zawng zawngte an hna bil an thawhna kawngah te, an level zelah enkawlna an pek that dan te, a thlawna enkawlna leh damdawi pek te, damdawiin faina leh dik taka damdawiin bawlhhlawh sawngbawl te, hawihawmna leh a vel fai kawngah te, environment vawn that kawngah te endik an ni a. NQAS Cerified damdawiin te hi India ram state lian zawkte a damdawiin ang tho a ni a, sawrkar damdawiin kan neih te hi mipui ten kan hman tangkai thiam a pawimawh hle a ni.
