Aizawl 27th May, 2024: Vawiin hian AAP leh PC Party inkawp chuan Assembly-a dan kalha nihna nei MLA 16 te nihna chinfel emaw dan siamthat anih theihnan Assembly Speaker leh ZPM Val Upa Council hnenah thu an thlen.
Aam Aadmi Party (AAP) Mizoram leh Peoples Conference (PC) Party te chuan, “Ram siamtha tura kan thawhhonaa kan hmalakna hmasa atan Assembly Speaker hnenah leh Zoram Peoples Movement (ZPM) Party Val Upa Council (VUC) hnenah thu inang kan thlen a. Kan thu thlenah hian ‘The Rules of Procedure and Conduct of Business in Mizoram Legislative Assembly’ anga Assembly Subject Committee pakhat aia tama MLA te member an nih theih loh laia MLA 16 lai Committee pakhat aia tama an tel thu te; he dan vekin Minister te Committee-a member nih a khap laia Portfolio nei thlapa Minister of State rank and status nei MLA 4 te Committee hrang hranga an tel thu te; leh he dan vekin Ethics Committee-a Govt. Chief Whip / Govt. Whip tel a khap laia Whip chu member anih thu te kan ziak lang a ni.
“Kan rama rorelna in sang bera hetiang nasa taka dan bawhchhiatna a awm hi a pawi kan tiin a tha lo kan ti tak zet a. Ram hruaitu pawimawh ten kan rorelna in sang bera dan an bawhchhia anih chuan thil tha lo tam tak a thlen thei ang tih kan ring a. Chumai ni lovin hetianga dan bawhchhiaa nihna nei te hi dan ang taka siamrem anih chuan mipui sum (public money) tam tak hum (save) theihna a ni dawnah kan ngai.
“Chuvang chuan, heng dan bawhchhiatna te hi tihtawp nghal anih theih nana hma la tur emaw hamthatna insiam sak nana hetianga kal hi a tul anih chuan dan hi siamthat anih nana hma la turin Assembly Speaker leh ZPM VUC te hi kan ngen ta a ni,” tiin thuchhuah an siam.
