Tun hnaia Mizoram chhung hmun thenkhata vawk hrileng mekah Darlawnah pawh ASF avang hian vawk 100 an thi tawh a. Vawk neitu te hian an vawk hrikai nia an rinhlelh chu an kaphlum bawk a ni.
Darlawna Vawk hrileng hi kumin March thla laihawl aṭangin a leng tan a. A hma deuh pawhin ASF avanga thi hi a lo awm zauh zauh tawh a, chutih rualin hun engemawti chhung a ziaawm leh ṭhin a. Tun hnaia ASF hrileng erawh chu vawk lian leh vawkpui lam a hrut nasa hle a. Ni 2/3 hnuah an thihpui hlawm zel a. Tunah hian vawk vulha eizawng mek chhungkaw tam tak an buai a, vawk neituten hmun ṭhenkhatah phei chuan vawk dang a kai loh nan tiin an kaphlum bawk a ni.
ASF hian tunah hian Darlawn khawchhunga VC pathum huam chhungah a tuam chhuak ṭan mek a. Nitin vawk an thih mek avang hian VC ten mahni area theuhvah a phumna tur hmun JCB hmanga laiin vawk thi hi an phum a, Khawtlang an buai hle a ni.
