October 23, 2023 (Thawhtanni) hian Community Hall, Dengsur khuaah Public Meeting neih a ni a. Pu Zodintluanga Ralte, Thorang INC Official Candidate chuan thusawiin, Congress Party zawm thar Pu Lalparmawia, Ex-VCP (MNF) Dengsur hovin mi thar 17 a lawm lut a, MNF-15 leh ZPM-2 an ni.
He huna thusawitu Pu Zodintluanga Ralte, Thorang INC Official Candidate chuan Congress Party hian kan sorkar laiin tihsual kan nei ve teuh ang tih kan ring a. Mahse, sorkarna siam ve tawh thin MNF nen hian min khaikhin chhin teh u. Kan ti ang kan tih ti mai thin Congress Party kan ni, a ti. In chung nei tha lo tan Rangva kan sem ang kan ti a, kan sem mai a. NLUP cheng nuai 1 kan sem ang kan ti leh a, kan sem leh mai a. Tunah hian mi tang tak takte tan “Tang Puihna” cheng nuai 2 kan pe ang kan ti a, kan sorkar phawt chuan kan ti leh tak tak dawn. A tih theih dan kan ruahman fel tawh a ni, a ti bawk.
Pu Zodintluanga chuan Thorang bialah hian mi rethei leh harsa tak tak kan thahnem a. Mi taima, kuthnathawk thin ni mah i la natna khirh tak tak tuar mek te, Cancer leh natna harsa bik veite tan Insurance policy fel tak kan duang a. Pawisa pek lawk hmasak ngai miah lovin cheng nuai 15 thlengin damlo harsa inenkawlna tur hi Congress Party kan sorkar anih chuan in bill thei dawn a ni. Tin, Congress Party kan sorkar chuan hemi atan hian Mizoram Budget-ah kum tinin cheng nuai 500 (Vbch 5) kan dah ziah dawn a ni, a ti bawk.
Zodintgluanga chuan Sorkar hnathawk Pension lak dan inrualkhai lo hi ennawn a ni ang a. Old Pension Scheme-a kir leh vek kan tum a. Chu chu a tih theih ngei a ni tih kan zirchiang tawh bawk. Tin, tar chawmna MNF sorkara cheng 400 ni thin pawh hi Congress Party kan sorkar chuan cheng 2000 ah kan ti sang dawn a ni, a ti bawk.
Pu Zodintluanga Ralte, Thorang INC Official Candidate chuan Thorang bial chanchin sawiin, kum 1998 hma lam khan Congress a sorkar a. Congress sorkar chhungin Bunghmun lamah kawng tha tak a awm a, MST Bus a service a. Tin, Electric luh lohna khuaah pawh Electric a lut a. Mahse, 1998 a MNF an sorkar atang khan kawng tha kan hmu tawh lova, Electric êng hmu thin khaw thenkhat pawhin êng an hmu tawh lo bawk a. Tuna MNF sorkar kum 5 chhung lek phei chuan kawng chhe tak min hnutchhiah a, tlan hleih theih loh khawpin mipuiin kan tuar leh ta a ni. Mizoramah Congress Party a sorkar a ngai a. Thorang bial hmasawnna hrang hranga hmachhawp kan neih mek kan tihhlawhtlin zelna atan he biala min thlang tling leh ngei turin Thorang bial mipuite ka sawm tak meuh che u a ni, a ti bawk.
Congress Party zawm thar leh thusawitu Pu Lalparmawia, Ex-VCP Dengsur chuan MNF ah kum 30 chuang zet ka lo awm ve tawh a. Mahse, kan ram Kristianna ril tak ka ngaihtuah hian India ram Central sorkar kan ngaihtuah thleng lo thei lo a. Central-ah BJP sorkarna hnuaia kun kan ni a. Tin, Congress Party-a ka lo luh hmaa ka awmna MNF Party hian BJP kan thawhpui a, kan ram dinhmun tak tak ka ngaihtuah hian Sakhaw Zalenna duhtu Congress Party hi zawm loh theih loh niin ka hria a ni, a ti.
Zawhna ka dawng nual a, “Engati nge ZPM ah i luh zawk loh?” min ti a. Ka chhanna chu, “BJP hian Mizoram hi tih chhiat vek a, kan Kristianna tih dal tumin Regional Party a hmang thin a. MNF leh ZPM te tho hi Mizorama Regional Party an ni a, sorkarna pawh siam se a thawhpui tur chu BJP tho a nih avangin ka zawm duh lo a ni,” a ti.
Pu Lalparmawia chuan BJP hian India ram hi Hindu Lalna rama siam an tum a. Chumi atan chuan Regional Party MNF leh ZPM te hi a luhkaa hman tumin hma an la mek a. Hemi ka duh loh avangin leh kan thenawm State Manipur han thlir hian hetiang dinhmuna kan din ve lohna atan Congress Party ka rawn zawm a ni, a ti bawk.
He hun hi Pu Biakchungnunga, President Dengsur Unit chuan a kaihruai a. Pu Zolura, MCC, Thorang Block-I chuan hunserh hmangin, Pu Albert Lalthlamuana, GS MPCC, Pu Lallianzuala Khenglawt, Secretary MPCC, te’n thu an sawi a. Party hruaitu thahnem takin an tawiawm bawk a ni.
