Inrinni khan Deputy Chief Minister Pu Tawnluia chuan Synod Conference Hall, Aizawla programme buatsaihah Aizawla Motor Lut Hmasa Ber tih lehkhabu a tlangzarh.
Pu Tawnluia chuan Aizawla motor khalhluttu hmasa Pu C.Rochhinga (L) chu pa tumruh, hmathlir thui tak nei, taima, huaisen leh mahni inrintawkna nei ngah mi a ni a, a chanchin chhiartu te tan zirchhuah tur tam tak a awm a ni, a ti a. Mizo pa tlawmngai, hawihhawm leh aia upa te zahthiam, Mizo hnam rilru pu mi a ni tiin Pu Tawnluia chuan Mizo hnam changkanna leh hmasawnna atana ngaihtuahna seng thin mi a ni, a ti. Deputy Chief Minister chuan Pu C.Rochhinga tu leh faten an pa chanchin, tunlai thangthar te chhiar theih tura an buatsaih chu lawmawm a ti a. A chhiartu ten hlawkna engemaw tal an chhar chhuah ngei a beisei thu a sawi a ni.
Pu C.Rochhinga hi kum 1919 January thla khan Sialhauah a piang a. Kum 1942, September ni 10 ah Sairang atangin Aizawlah truck (chevrolet 15 CWT) a khalh lut a. Chu chu Aizawla motor khalh luh hmasak ber a ni.
Programme ah hian Pu TT Zothansanga’n lehkhabu thlirlawkna hun a hmang a. He lehkhabu tlangzarh tak publish tu Pi Remliani Chawngthu, Pu C.Rochhinga fanu chuan kalkhawm te lawmna leh a pa chanchin tawi sawina hun a hmang a ni.
