Vawiin khan UD&PA in Swachh Bharat Mission(Urban) hnuaia Indian Swachhata League denchhena a buatsaih, Youth Rally Programme chu Deputy Chief Minister Tawnluia’n Mahatma Gandhi Memorial Statue bul, Zodin Square-ah a vailiam.
Deputy Chief Minister Tawnluia chuan September ni 17 atanga October ni 2 thleng chu India ram pumah faina kawnga hma kan sawn theihnan ‘Swachh Amrit Mahotsav’ hman tur a ni a, hemi hnuaia hmalakna hmasa ber ‘Indian Swachhata League’ denchhena Youth Rally vawiin ni-ah hman theih a ni chu lawmawm a ti a. Pu Tawnluia chuan Youth Rally in a tum ber chu India ram khawpui bawlhhlawh awmlohna ‘garbage free city’ a siam a ni a, hemi kawngah hian thalaite kaihhruaina a beihpui thlak a ni a ti. Bawlhhlawh awmlo a thianghlim taka kan khawpuite siam a nih theihnan leh thalaite cho chhuah hi a ni a ti bawk. Thalaite hi ram innghahna leh nakina kan kut ke tur te an nih tih hrerengin Youth Rally hi buatsaih a ni a ti a. Mizoram khawpui te fai leh thianghlim taka siam hi mitin mawhphurhna a ni a, chhungkua-ah bul tanin khawtlangah a arh chhuak tur a ni a ti a. Kan ram leilung thianghlimna atan vawiin atanga kan theihtawp kan chhuah a ngai a, bawlhhlawh ti tlem tur chuan plastic a siam no, fian thleng leh bottle bakah hmankhat daih sarang kan hman loh a pawimawh em em a, kan chhuahvahna a puan ip pai kan uar zel te pawh a ngai a ni a ti a. Mizoram hi fai, nuam leh thianghlim taka kan siam nan ‘Garbage Free Mizoram’ siam turin mitin te a sawm a, faina kawnga Sawrkar hmalakna te chu Sawrkar ang chauhin a tih theih lova, mipuite tawiawmna leh pawl hrang hrangte thawhhona tel lo chuan hma a lak theih tak tak lo tih hre reng chungin Sawrkar tawiawma theihtawp chhuahpui chhunzawm zel turin a chah nghal bawk a ni.
Indian Swachhata League denchhen hian India ram khawpui hrang hrangte in elna a awm nghal dawn a ni a. Mizoramah District hrang hrangah hman a ni bawk a, Aizawl District hi Aizawl Clean Avengers ti a in vuahin, Team pathum ah an insiam a. Team 1 te hi Hrangbanna College, NSS an ni a, an ni hian Aizawl khawpui chhunga bawlhhlawh chhar faiin Sakawrhmuituai Tlang a bawlhhlawh awm te an tifai nghal dawn a. Team 2 te hi Pachhunga University College, NSS niin Muthi Park lam an pan a, Team 3 te hi Govt. T. Romana College, Adventure Club niin Lalsavunga Park tihfai hna an thawk ang. Team tinah hian Captain leh Leader awm vekin, an vai hian mi 250 vel an ni a. Vawiin a kal zawng zawngte hian Faina Thutiam an tiam vek a, slogan writing competition buatsaih niin, result erawh October ni 2 a puan tur a ni thung a ni.
