Vawiin 17th May, 2024 hian BJP chuan an State Office, Mipui Run, Upper Republic ah Friday Political Session neiin, Pu Vanlalhmangaiha, State Social Media Convener-in inkhawm a kaihruaia, Vanlalhmuaka,State President-in thusawina hun a nei bawk.
Vanlalhmuaka, BJP Mizoram State President chuan thusawiin, “Mizoram hian heti khawpin Development kan mamawh a, Development dawng tura kan inbuatsaih lo lutuk leh kan Rama Development lo luhna atana kan kawngka kan hawng ṭha duhlo hi a pawi hle a, India ram hmun hrang hrang ah Development nasa tak a thlen mek laiin keini erawhin a do zawngin hma kan la fo a, kan la harh hleithei lo hi a pawi tak zet a ni,” a ti.
Vanlalhmuaka chuan, “Mizoram ah pawh Central hmalakna in Development hna nasa taka thawh mek a ni a, Aizawl-Champhai intlawhpawh nan hun tam tak kan khawhral ṭhin a, tûnah chuan darkar reilo te chhungin kan intlawhpawh thei tawh a ni. Heng hmasâwnna lo thleng te hi mipuite’n kan lo suangtuah tawh ṭhin kha a ni. Nakin lawkah chuan Chhim lam ah lawng lianin bungrua arawn phur anga chuta tang chuan bungrua kan la chaw lut ruih ruih anga, Mizoram kaltlangin NE State hi kan la chawm thei hial zawk dawn a ni. Chuvangin Mizoram hmabak hi a êng hle a, a chhunga cheng keini hi kan pawimawh hle dawn a ni,” a ti.
Vanlalhmuaka chuan sawi chhunzawmin, “Kan ram Mizoram hian eng nge a mamawh ber? kan tih chuan Development/ Hmasawnna hi a ni a, chutiang hmasawnna chu kan hma lawkah kan ban phak mai ah a awm a, chu hmasawnna dawngsawng tur chuan inbuatsaih ila, development hlauh tur chi a ni lo, eng pawh sawrkar se la sawrkar tih tur pawimawh chu development tho hi a ni a, development min pe thei tu tur party lam hi kan hawi a ṭul tawh hle a ni. Ram ṭhenkhat Development nasa taka dawngtute an inbuatsaihna ṭhat tawk loh vanga kawng tam taka tawrhna awm thei a awm bawk a, chuvangin kan ramin Development a dawn ruala chu hmasawnna chu kan lo dawnsawn thiam theih nan Mipui pawh inbuatsaih a ṭul hle a ni,” a ti bawk.
