Aizawl, the 17th March 2022 : Vawiin tlai 3:30 khan Disaster Management & Rehabilitation changtu Minister, Home Minister ni bawk Pu Lalchamliana kaihhruaina hnuaiah Secretariat Conference Hall MINECO ah meeting chhawng li neiin tunhnaia Mizoram a chhiatna hrang hrang thleng chhuina – Magisterial Inquiry leh SIT Report hrang hranga hmalak zuina te thlirho a ni.
Mizoram Sawrkar chuan tun kum 2/3 chhung khan chhiatna (disaster) hrang hrang thlengah uluk taka chhuitu tur ruatin hma a lo la tawh a. Heng thil thleng chhuina te hi sawiho a ni a –
1) Ni 2.7.2019 –a BSUP Complex, Durtlang- leimin chungchanga Magisterial Inquiry Report ;
2) Ni 11.6.2021-a Thuampui Veng, Aizawl – in chima chhiatna thleng chungchanga Magisterial Inquiry Report;
3) Ni 17.12.2021 zing a Deputy Commisioner, Aizawl Office kang chungchanga Magisterial Inquiry Report;
4) April, 2021 a Mizoram hmun hrang hranga kangmei rapthlak tak tak chhuak chungchanga Special Investigation Team (SIT) Report.
Heng Chhiatna thleng hrang hrang buaipuitu Department te leh District tina Deputy Commissioner te hmalak mek dan te chu sawiho a nih hnuin Home Minister Pu Lalchamliana chuan hmalak tawhna hrang hrangah lawmthu sawiin hmalakna tur hrang hrang hmabakah te chak taka hma la theuh turin Minister chuan Department te a chah a ni.
A bik takin kum 2021 April thlaa Mizoram hmun hrang hranga kangmei chhuak chhuina SIT Report chungchangah, kangmei chhuak thei, ram leh in lama kangmei venna kawngah Sawrkar Department hrang hrang leh mipui kan tanho a pawimawh thu meeting ah sawilan a ni a. SIT Report in a Department te ti tura a tih anga chak taka hmalak theuh a pawimawh thu tarlan a bawk a. Mizoram-ah khua a lo thal tan chho leh mek a, kangmei chhuak avanga in leh lo, nunna leh thing leh ramsate chunga chhiatna thleng thei venna kawngah tan la theuh turin Department, Deputy Commissioner, Village Council/Local Council, NGO te leh mipui te chu Minister chuan a chah bawk a ni.
A bik takin kangmei chhuak thei venna kawngah State level-a mawhphurtute bakah District hrang hranga mawhphurtute leh Village/Local level a mawhphurtu ten thahnemngai leh zuala hma la turin meeting chuan a ngen a, Kangmei chhuak thei laka invenna kawng hrang hrang leh fimkhurna kalpui theuh turin Sawrkar in mitin te a ngen nawn leh a ni.
Meeting ah hian Pu H. Lalengmawia IAS, Commissioner & Secretary Disaster Management & Rehabilitation; Addl. Secretary, DM &R Pu Vanlalmawia; Pu John LT Sanga, Director, DM &R leh a thawhpui senior officer-te; IGP (Hqrs) Pu John Neihlaia leh Police hotu dangte; Pu C. Lalthanmawia, Fire & Emergency Services Director; Dr. Lalhriatzuali Ralte Aizawl DC leh Pu C. Lalruaia Aizawl SP leh senior officer dangte an tel a ni.
