Aizawl, April 4 : District Council & Minority Affairs Minister Pu R. Lalzirliana chuan Mizoram sawrkarin thalaite hmasawnna atan infiamna ruhrel siam kawngah nasa takin hma a la tih sawiin, khawpui a chengte leh thingtlanga cheng ten hmasawnna an tem rual theihnan theihtawp an chhuah tih vawiina 20th Mizoram Football Association Cup, 2022 Final match, Keifang Centenary Football Ground a neih-ah a sawi.
Pu R. Lalzirliana chuan a department enkawl District Council & Minority Affairs pawhin ram chhung hmun kilkhawr leh hnufual deuh khaw hrang hrangah infiamna ruhrel, khawpui lian zawka cheng ten an neih ang hi a theih chin chinah chhawp chhuah sak tumin tan an la tih sawiin, COVID-19 hripui leng vangin ruahmanna awm sa ah pawh hma kan la thei lova, kan dinhmun a ziaawm takah hian kan che tan thei tawh turah kan in ngai a, tuna kan project neih sa bakah hian engemawzat neih belh kan inbeisei bawk a ni, tiin Mizoram hmun kiltin atangin infiammi tha ber ber lo chhuak se tih hi kan duhthusam a ni a, hma pawh kan la zel ang a ti.
Minister hian Keifang Centenary Football Ground Pavillion a dah tur thutthleng 100 a pek tur thu a sawi bawk a ni.
20th Mizoram Football Association Cup, 2022 hi March ni 29, 2022 atang khan khelh tan niin vawiin April ni 4, 2022 hian a hmawr bawk a ni a. Saitual District Football Association chuan he tournament hi thlengin, inkhel zawng zawng hi Keifang Centenary Football Ground ah nghah a ni a, Mizoram chhung District 11 atangin team pakhat theuh an tel a ni.
Inkhel vawi 15 awmin final ah hian Aizawl District aiawh Kanan FC leh Champhai District aiawh FC Vengthlang North, Champhai ten an khel a, FC Vengthlang North, Champhai hian sikhat faia hnehna changin an champion a ni.
Minister hian vawiin chawhma lam khan Saitual DC Office building sak meko, Saitual KVI ram ami chu tlawhin a endik a, Saitual DC office hi chhawng li a sanga sak tura ruahman niin chhawng tin hi 585.64 sqm a zau a ni a, kum 2023 kum tawp hma a sak zawh hman tuma tan lak a nih thu a satu contractor hian a lo sawi a ni.
