Vawiin khan P&E Minister F.Rodingliana chuan a chenna In Dawrpui vengah chanchinthar lakhawmtute kawmin, “Revamped Distribution Sector Scheme (RDSS) hnuaiah Electric sem darhna kawnga hmasawnna hna chi hrang hrang thawh mek a ni a, hemi in a ken tel, electric Bill siamna software thar chu Aizawl, Lunglei, Lawngtlai, Siaha, Serchhip, Champhai, Khawzawl, Saitual leh Kolasib-ah te hian May 2025 atangin hman a lo a ni ta a ni,” a ti..
Minister chuan, “He billing software tharin a ken tel zingah Central Electricity Regulatory Commission (CERC) duh dan zulzui a siam, Mizoram Electricity Supply Code Regulations, 2013 in a sawi angin Tariff slab sang zawka bill chhut (calculate) loh tur, nimahsela reading lak hun dik taka lak a nih loh vanga tariff slab sang zawka chhut (calculate) ngai thin ti bo turin Pro rata basis (daily basis) bill calculation chu he billing software thar ah hian hman a ni. Bill chhut (calculate) dan chipchiar zawka hre duh tan Electric Department office ah zawh fiah theih reng a ni a.
“He software thar hman tan avang hian bill la hmulo awm theih a ni a, Bill la hmu lo te tan pawh computer atangin http://pedmconsumer.ugoerp.com/ ah leh mobile application atanga pedmconsumer application download theih niin hetah hian bill pawh a pek nghal theih bakah bill chipchiar zawkin pdf format a download theih a ni bawk.
“Tin, he scheme (RDSS) ah hian kan meter hman lai hi smart meter a thlak vek tur a ni a, State danga kalpui tawh smart meter hmanga pre-paid system pawh kalpui ve tura hmalak chhoh mek a ni,” a ti bawk.
