Mizo zirlai mi 75 leh State dang zirlai mi 20, an vaiin mi 95 ten ZMC aṭanga MBBS zir chhuaka, hlawhtlinna an chang chu Congress Party chuan lawmawm a tiin MBBS zir chhuak tate an kal zelna turah duhsakna a hlan a ni.
MPCC chuan, “Congress Sorkar hmasa CM Pu Lal Thanhawla’n damlo mirethei, khawsak harsa zawkte tan phai lam kher ngai lova, damdawi in changtlung kan neih theihna tura a hmalakna MNF ten cheng vaibelchhe 78 zet mai an seng chunga an tihlawhtling thei lo chungin Congress Sorkar khan bul ṭan ṭha lehin Referral Hospital hi December ni 10, 2010 khan CM Pu Lal Thanhawla chuan a hawng ta a. Hospital changtlung kan neih theihna atana khatih laia CM Pu Hawla, Health Minister Pu Lalrinliana Sailo leh Parliamentary Secretary Pu S. Laldingliana te an thawkrim hle a ni.
“Kum 2013 aṭang khan Medical College neih tumin Congress Party chuan theihtawp a chhuah a. February ni 19, 2014 ah Ministry of Health & Family Welfare chuan Mizoram Sorkar hnenah Medical College din phalna pein sum pawh vaibelchhe 189 rawn sanction a ni a. Medical College kan neih theihna turin Health Minister Pu Lal Thanzara chuan theihtawp chhuahin a bei a. Harsatna tam tak paltlang chung leh NEDP pawisa hmanga khawl changkang leh ṭha zawk tam tak lei a nih hnua tehna hrang hrang paltlanga Medical Council Of India in Medical College din min phal sak a, a hming atana MIMER min pawm sak nghal kha Congress Party chuan lawmawm a tiin hemi atana ṭhahnemngai taka thawktu Pu Lal Thanzara hi a chhuang tak zet a ni.
“Vawiin niah harsatna tam tak paltlang chunga Congress Sorkarin a lo sual chhuahna a zara zirlaiten result ṭha tak an nei leh a bik takin Mizo ṭhalai mi 75 zet mai ten MIMER, tuna ZMC tia MNF ten an phuahchawp aṭanga MBBS an zir chhuak thei ta hi Congress Party chuan lawmawm a tiin Pathian hnenah lawmthu a sawi a. A thawktute pawh an kal zelna turah duhsakna a hlan nghal bawk a ni,” an ti bawk.
