Nimin chawhnu dar 3 khan Siaha Press Club ah Dr. K. Beichhua, MLA chuan thuthar lakhawmtute kawmin, BJP a zawm tur thu a sawi. Dr. Beichhua chuan, Minister atanga paihthlak ka nih hnu lawkah MNF primary member ka nihna hlihsak zui ka ni ta mai kha zawhna a tam phah hle a. CM thupek zawma engkim kalpui ka ni bawk si a, vawiin ni thleng hian keipawhin paihthlak ka nihna chhan ka hre bik lo, a ti a.
Media te zawhna chhangin BJP a zawm dawn thu a sawi a. Sixth Schedule Amendment min tihhlawhtlinsak turin Central sorkar ka ngen a, Aspiration district a Siaha district min puan sak turin ka ngiat bakah Special Assistance leh Medical College te anga min tihsak ve turin ka ngiat bawk a, Central hotute nen inbiakna khunkhan taka kan neih hnuah BJP zawm turin thutlukna ka siam ta a ni, a ti.
Dr. K. Beichhua chuan kum 4 chhunga covid 19 vanga hun harsa kan ramin tawk mahse Pathian tanpuina ka dawng nasa a, kan ram tan hmasawnna hna nasa taka thawk hman nia ka inhriat avangin ka lawm hle a ni, a ti bawk.
